तनहुँ ।
तनहुँ निर्वाचन क्षेत्र नम्बर–२ मा प्रतिनिधिसभा निर्वाचनको राजनीतिक समीकरण फेरिने संकेत देखिएको छ। उज्यालो नेपाल पार्टीबाट उम्मेदवारी दिएका मनराज गुरुङले उम्मेदवारी फिर्ता लिँदै राष्ट्रिय स्वतन्त्र पार्टी (रास्वपा) लाई समर्थन गर्ने घोषणा गरेका छन्। गुरुङले रास्वपाका उम्मेदवार श्रीराम न्यौपानेलाई समर्थन गर्ने स्पष्ट पार्दै आफ्नो समर्थन( घण्टी) चुनाव चिह्नलाई रहने बताएका छन्।
उनले यो निर्णयलाई सहिदहरूको बलिदानप्रति सम्मान र देशको आर्थिक समृद्धितर्फको साझा यात्रासँग जोडेर व्याख्या गरेका छन्। सहिदको बलिदानको सम्मान र आर्थिक समृद्धिको सपना नयाँ–नयाँ जुधेर होइन, जुटेर मात्र गन्तव्यमा पुग्न सक्छ, गुरुङले भने, त्यही मर्मलाई आत्मसात गर्दै मेरो समर्थन राष्ट्रिय स्वतन्त्र पार्टीलाई रहनेछ। उनले पुराना राजनीतिक दलहरू पुनः सत्तामा दोहोरिने हो भने जेन-जी विद्रोह, पुस्तान्तरण र परिवर्तनको एजेन्डा नै प्रश्नको घेरामा पर्ने तर्क गरे।
नवयुवाहरूको त्याग र बलिदानबाट भइरहेको निर्वाचनपछि पनि यदि पुरानै सत्ता खिचातानी, अस्थिर राजनीति र सम्झौतावादी अभ्यास दोहोरियो भने जेन–जी विद्रोहको औचित्य पुष्टि हुन सक्दैन, गुरुङको भनाइ छ। नयाँ राजनीतिक शक्तिहरूबीच प्रतिस्पर्धा हुँदा मत विभाजन भई अन्ततः पुरानै शक्तिलाई फाइदा पुग्ने सम्भावनालाई ध्यानमा राख्दै उम्मेदवारी फिर्ता लिएको उनले स्पष्ट पारे। उनका अनुसार परिवर्तनको पक्षधर शक्तिहरू एक ठाउँमा उभिनु अहिलेको आवश्यकता हो।
तनहुँ–२ मा सुरुमा १२ जनाले उम्मेदवारी दर्ता गराएका थिए। मनराज गुरुङले उम्मेदवारी फिर्ता लिएसँगै अब ११ जना उम्मेदवार चुनावी प्रतिस्पर्धामा रहनेछन्। यसैबीच, तनहुँ–१ मा १६ जनाले उम्मेदवारी दर्ता गराएकोमा हालसम्म कसैले पनि उम्मेदवारी फिर्ता लिएका छैनन्।
