चितवन जेठ २७ , राजमार्गमा दिउँसै सवारी लुट्पाटमा संलग्न ११ जनाको गिरोहलाई शनिबार मुग्लिङ प्रहरीले पक्राउ गरेको छ । माइक्रोबसमा ठुलो परिमाणमा सुन ल्याएको थाहा पाएपछि पिच्छा गर्दै चालकलाई नियन्त्रणमा लिई सुन लुट्पाटमा संलग्न सो समुहलाई धादिङ प्रहरीको सहयोगमा पृथ्वी राजमार्गको जोगिमारा र बैरेनीबाट पक्राउ गरिएको हो ।
बागलुङका ताराप्रसाद श्रेष्ठले बागलुङमा रहेको सुन पसलमा बिक्रिको लागि काठमाण्डौमा ३३ तोला सुन किनेका थिए । पहिल्यैदेखी चिनजान भएको र संधै सामान लगिदिंदै आएका माइक्रो चालक मकवानपुर चुरियामाईका पुर्णबहादुर पाख्रिनको जिम्मामा काठमाण्डौका दुई वटा पसलमा खरिद गरिएको करिव साँढे १७ लाख रुपियाँको सुन बा२ख ३४०७ नम्बरको माइक्रो बसमा बागलुङ पठाएका थिए । शनिबार विहान काठमाण्डौबाट छुटेको सो माइक्रोबस चालकको साथमा ठुलो परिमाणमा सुनआउँदै गरेको सुराक पाएपछि लुटेरा समुहले दुई वटा ट्याक्सि भाडामा लिएर काठमाण्डौदेखि पिच्छा गर्दै आएको थियो । माइक्रो बसलाई भेट्टाउन नसकेपछि धार्केस्थित सडक कर संकलन काउण्टर र जोगिमाराको काउण्टरमा खबर गरेर पिच्छा गर्न लगाए । लुटपाटमा करसंकलन कार्यालयका कर्मचारीको समेत संलग्नता रहेको प्रहरीले जनाएको छ । काठमाण्डौको टोलीले धादिङमा भएको आफ्नो संयन्त्रको प्रयोग गरी जोगिमाराको जवाङमा पुगेपछि बा५५प १३४९ नम्बरको मोटरसाइकलले माइक्रोबसलाई बाटो छेक्यो । त्यतिबेलै पछाडीको टोली आइपुग्यो । अवैध सामान ल्याएको भनि यात्रुलाई समेत छक्याएर चालकलाई अपहरणशैलीमा बाहिर निकालेको एक प्रत्यक्षदर्शी माइक्रोका यात्रुले प्रहरीलाई बताए । चालकलाई धम्क्याएर सुन दिन आग्रह गरेपछिसुन धनीलाई चालकले फोन गरे । एक लाखसम्ममा कुरा मिल्ने भनेर चालकले श्रेष्ठलाई बताएपछि सुनकै कारण जोखिम मोल्नु भन्दा एक लाख रुपियाँ बराबरको सुन दिएर कुरा मिलाउन भनेपछि दारेचोक सुनचाँदी पसल फिस्लिङ्गमा दुईतोला सुन काटेर दिएको चालक पुर्णबहादुरले बताए । उता मुगिलङ प्रहरीलाई पनि सो माइक्रोमा अवैध सुन आउँदै छ भन्ने सूचना आयो । मुग्लिङ प्रहरी प्रमुख लोकबहादुर गुरुङ भन्छन् माइक्रो रोकेर खानतलासी लिंदा चालकले सो विषयमा कुरा गर्न नचाहँदा नचाहँदै एक यात्रुले जोगिमारामा ४५ मिनेट रोकिएर कारोबार भएको जानकारी दिए पछि माइक्रो सहित चालक नियन्त्रणमा लिएर सुन लुट्ने समुहको खोजिमा लाग्यौं, लुटेरालाई सुन काटेर दिएको दारेचोक सुनचाँदी पसलमा पुगेपछि थप अनुसन्धान गर्दै जाँदा लुटेराको पहिचान भएको प्रहरी निरीक्षक गुरुङ बताउँछन् । प्रहरीले डकैतिमा प्रयोग भएको मोटरसाइक बा५५प १३४९ सहित जोगिमाराबाट दुई जना र बैरेनीबाट बा१ज ४६९३ र बा१ज ४९४४ नम्बरका दुई ट्याक्सि र एक मोटरसाइकलामा आएका नौ जनालाई नियन्त्रणमा लिएको हो । काठमाण्डौबाट धादिङ जाने भनेर ४५ सयका दरले ट्याक्सि लिएर काठमाण्डौदेखि पिछा गरेको खुलेको छ । घटनामा संलग्न ट्याक्सि इलाका प्रहरी कार्यालय गजुरीमा राखिएको छ । 
