१७ असोज, काठमाडौं । नेपाल पुलिस क्लबले एनसेल कप फुटबलको क्वाटरफाइनलमा संकटा क्लबको सामना गर्ने भएको छ ।
बुधबार भएको समूह चरणको अन्तिम खेलमा जाउलाखेललाई ३-१ ले पराजित गर्यो । जितपछि ३ खेलबाट ७ अंकका साथ समूह डीको विजेता बनेको पुलिसले समूह सीको उवविजेता संकटासँगको भेट पक्का गरेको हो ।
दशरथ रंगशालामा भएको खेलमा अग्रता भने जाउलाखेलले लिएको थियो । खेलको ४० औं सेकेण्डमा नै राज पौडेलले एक्लो प्रयासमा गोल गर्दै जाउलाखेललाई सुरुवाति अग्रता दिलाए । यो एनसेल कपमा सबैभन्दा छिटो भएको गोल हो । खेलको ११ औं मिनेटमा पुलिसका जुमानु राईले बराबरी गोल फर्काए । ५३ औं मिनेटमा रमेश कटवाल र ७० औं मिनेटमा भरत साहले गोल गरेपछि पुलिस ३-१ ले विजयी भयो ।
प्रतियोगिता अन्तरगत पहिलो क्वाटर फाइनलमा भोलि नेपाल आर्मी र मध्यपुर युथ एशोशिएसन भिड्ने छन् ।
