ताप्लेजुङ असोज १ गते ताप्लेजुङको तापेथोक गाउं विकास समितिको लाङजेक पहिरोमा परेर एक जनाको ज्यान गएको छ । तापेथोक ९ निवासी अन्दाजी ४५ वर्षिय हर्कजंग हेल्लोक ‘लाङ्जे कान्छा’ को तापेथाकको लप्सेटारबाट यासाङ तर्फ जाने क्रममा पहिरोमा परेर मृत्यु भएको तापेथोकका सामाजिक परिचालक बुद्ध लिम्बुले बताउनुभयो । गत २८ गते देखि वेपत्ता बन्नु भएका उहाँलाई खोजिगर्ने क्रममा स्थानीयहरुले पहिरोमा फेला पारेका थिए । उहाँ कामको शिलशिलामा याङ्सा जानु भएको उहाँका दाजु हर्कबहादुर हेल्लोकले बताउनुभयो । जिल्ला प्रहरी कार्यालय ताप्लेजुङले भने घटनाको जानकारी नआएको जनाएको छ ।
