एकीकृत माओवादीको महाधिवेशन आयोजक समितिको बैठक आज पनि बस्ने ।।

काठमाडौँ, १८ साउन । एकीकृत नेकपा माओवादीको महाधिवेशन आयोजक समितिको बैठक आज पनि बस्दै छ । बैठक बिहान ११ बजेपछि केन्द्रीय कार्यालय कोटेश्वरको पेरिसडाँडामा बस्ने केन्द्रीय सदस्य हितबहादुर तामाङले जानकारी दिनुभयो । आजको बैठकमा आयोजक समितिको विवादलाई टुङ्ग्याएरपूर्णता दिइने उहाँले बताउनुभयो । आयोजक समिति एक सय ७५ सदस्यीय बनाउने सहमति भएपनि थपिने सूचीका विषयमा भने हिजो बसेको बैठकमा विवाद भएको थियो । यसैगरी आज महाधिवेशन प्रनिनिधि छनोटको आधार, जिल्ला सम्मेलन, राज्य सम्मेलन, महाधिवेशनस्थल चयनलगायतका विषयमा छलफल हुने तामाङले जानकारी दिनुभयो । त्यस्तै नेताहरूको कार्य विभाजनबारे पनि आजको बैठकले निर्णय गर्ने नेताहरूले बताएका छन् । साउन पहिलो साता राजधानीमा सम्पन्न सातौं विस्तारित बैठकले माघमा महाधिवेशन गर्ने निर्णय गरे पनि स्थल र दिन भने तोकेको छैन ।