काठमान्डौ असार २० गते । मुलुकको वर्तमान
राजनीतिक अवस्थाको विश्लेषण र निकासको लागि साझा अवधारणा तय गर्न आदिवासी
जनाजतिहरुको राष्टिय सम्मेलन आजबाट राजधानी सुरु हुँदैछ । दुई दिने
सम्मेलनले जातीय पहिचानसहितको सङ्घीयता सुनिश्चितताका लागि भावी रणनीति तय
गरिने नेपाल आदिवासी जनजाति महासङ्घले जनाएको छ । पूर्व आदिवासी जनजाति
ककस, जनजाति महासङ्घ, राष्टिय आदिवासी जनजाति महिला महासङ्घलगायतको संयुक्त
आयोजनामा हुने सम्मेलनमा विभिन्न देशभरका एक हजारभन्दा बढी जनजाति
अधिकारकर्मीहरुको सहभागिता रहने बताइएको छ ।
सम्मेलनमा डा. चैतन्य सुब्बा, डा.
कृष्णभट्टचन लगायतले कार्यपत्र प्रस्तुत गर्नुहुने कार्यक्रम छ ।
सम्मेलनबाट आदिवासी जनजाति लगायत उत्पीडित समुदायको सवाललाई उठान गर्ने
राजनीतिक दलको स्थापनाको बारेमा समेत औपचारिक निर्णय गरिने स्रोतले बताएको छ
।
पहिचानसहितको सङ्घीयताका विषयमा काङ्ग्रेस
र एमालेमा आदिवासी जनजाति नेताहरुले पार्टी नेतृत्व समक्ष फरक मत राख्दै
तत्काल सम्बोधन नगरे पार्टी परित्याग गर्नेसम्मका चेतावनी दिँदै आएको छ ।
