साउन १ गते । प्रदीप चौधरी, ,कपिलवस्तु पूर्वपश्चिम राजमार्ग अन्तर्गत
कपिलवस्तुको शिवपुर ७, चैनपुरमा जीप पल्टिंदा हिजो राती एक जनाको मृत्यु
भएको छ । मृत्यु हुनेमा शिवपुर ६, नवडिहवा बस्ने वर्ष ४० का जीप चालक
दुर्गा ठाकुर भएको प्रहरीले जनाएको छ । रा १ ज २१ नम्बरको जीप सडक छेउमा
थुपारिएको ढुंगामा ठोक्किएर पल्टिंदा जीपले च्यापेर गम्भीर घाइते भएका
ठाकुरको चन्द्रौटा स्थित संजीवनी सामुदायिक अस्पतालमा उपचारका क्रममा
मृत्यु भएको हो । मृतकलाई पोष्टमार्टमका लागि राति नै शिवराज अस्पताल
बहादुरगञ्जमा पठाइएको इलाका प्रहरी कार्यालय चन्द्रौटाले जनाएको छ ।
