२ करोड १६ लाख विगो र त्यति नै जरिवानाको फैसल
काठमाडौं ,१० साउन ।
विशेष अदालतले नेपाली कांग्रेसका नेता एवं पूर्वमन्त्री गोविन्दराज
जोशीले भ्रष्टाचार गरेको ठहर गर्दै डेढ वर्ष कैदको फसला सुनाएको छ ।अध्यक्ष गौरीबहादुर कार्की तथा सदस्यद्धय ओमप्रकाश मिश्र र केदारप्रसाद चालिसेको इजलासले बुधबार जोशीलाई डेढ वर्ष कैद र २ करोड १६ लाख १४ हजार ३ सय ७६ रुपैयाँ १४ पैसा विगो र त्यति नै जरिवानाको फैसला सुनाएको हो । अदालतले सम्पक्ति लुकाउन सहयोग गरेको भन्दै जोशीका साला बासुदेव पन्तलाई ६ महिना कैद र ६५ लाख जरिवाना तथा उनका कान्छा ससुरा तारानाथ पाण्डेलाई पनि ६ महिना कैद र १ लाख १४ हजार जरिवानाको फैसला सुनाएको छ ।
विशेषको फैसलाविरुद्ध जोशीले सर्वोच्च अदालतमा पुनरावेदन दिन सक्ने छन् । पुनरावेदनका लागि फैसला लागि ३५ दिनको समय हुनेछ । तर, पुनरावेदनका लागि उनले विशेषको फैसला बमोजिम धरौटी राख्नु पर्ने हुन्छ । ‘जोशीलाई पुनरावलोकनका लागि ३५ दिनको म्याद हुन्छ’विशेषका रजिष्टार धिरबहादुर चन्दले भन्नुभयो-’पुनरावबलोन दर्ता गर्न भने फैसला बमोजिम धरौटी बुझाउनुपर्छ ।’
जोशीको मुद्धामा वादी तथाप्रतिवादी दुबै पक्षको बहस ६ गते सकिएपछि फैसलाको मिति बुधबारलाई ताकिएको थियो । हदम्याद नाघेको भन्दै सफाई दिने विशेष अदालतको निर्णय उल्टाउँदै सर्वोच्चअदालतले सुनुवाई गर्न विशेष अदालत पठाएको थियो ।
विशेषका तत्कालिन अध्यक्ष भूपध्याजअधिकारी तथा सदस्यद्धय कोमलनाथ शर्मा र चोलेन्द्रशमशेर जबराको इजलासले २०६३ सालकार्तिक ३० गते हदम्यादको कारण देखाउँदै जोशी विरुद्धकोमुद्धा खारेज गरेको थियो । तीनपटक गृहसहित सात पटक मन्त्री भएका जोशीले पदकेा दुरुपयोग गरी ३ करोड ९३ लाख ६२ हजार ५ सय ७६ रुपैयाँ भ्रष्टाचार गरेको दावी गर्दै अख्तियार दुरुपयोग अनुसन्धान आयोगले २०६० साल माघमा विशेष अदालतमा मुद्धा दायर गरेको थियो ।
को हुन् गोबिन्दराज जोशी ?
भ्रष्टाचारको अभियोगमा जेल जानेहरुको लाइन पछ्याएका गोबिन्दराज जोशी २०५० सालसम्म सामान्य आर्थिक हैसियत भएका व्यक्ति हुन् ।उनलाई नजिकबाट चिन्नेहरुका अनुसार त्योबेलासम्म उनी लखरलखर हिंड्थे । पार्टीको कार्यक्रममा सहभागी हुन्थे । यसो लेख लेख्थे । बिहान बेलुकाको गर्जो टार्न समेत मुश्किल थियो । हुँदै जाँदा भाग्य बलियो भयो । बहुदलीय व्यवस्था यिनलाई पनि फाप्यो । पटक-पटक लाभको पदमा पुगे । लाभको पदमा पुगेपछि लोभ लाग्ने भैगयो । त्यसपछि यिनको ध्यान कमाउनैतिर केन्दि्रत भयो । भ्रष्टाचारले डुङडुङ गनाउन थालेपनि उनले लामो हात गर्न छाडेनन् ।
अदालतसित बयान दिने क्रममा उनले छोराछोरी बिदेशबाट कमाएर पठाएको र आफूले पनि लेखेर सम्पत्ति जोडेको दावी गरेका छन् । तर ढाँटे कुरा काटेर किन मिल्थ्यो ? करोडौंको सम्पत्ति उनले भनेजस्तै गरी जोडिन्छ भनेर कसले पत्याउने ? हुँदै जाँदा यिनले पनि भ्रष्टाचारकै कारण जेल यात्रा गर्नुपर्यो ।
तनहुँमा जन्मेका जोशी २०२४ सालदेखि २०३४ सालमा जिल्लाकै बिभिन्न विद्यालयमा पढाउँथे । त्यसपछि २०४७ सालमा उनले कानुन व्यवसायमा संलग्न भएर काम गरे । २०४६ सालको राजनीतिक परिवर्तनपछि उनी कांग्रेसमा सकृय भएर लागे । २०४८, २०५१ र २०५६ सालमा लगातार तनहुँबाट प्रतिनिधिसभामा निर्वाचित भए । त्यसपछि उनलाई पटकपटक मन्त्री हुने भाग्य जुर्यो ।
कहिले कहिले भए मन्त्री ?
शिक्षा समाज कल्याणमन्त्री -२०४८।९।१५ देखि २०५१।८।१३ सम्म
शिक्षामन्त्री -२०५२।६।६ देखि २०५३।११।२८ सम्म
गृहमन्त्री -२०५५।१।८ देखि २०५५।९।९ सम्म
गृह र सामान्य प्रशासनमन्त्री -२०५५।९।१०देखि २०५६।२।१६ सम्म
जलस्रोतमन्त्री -२०५६।२।१७ देखि २०५६।११।१० सम्म
गृहमन्त्री -२०५६।१२।८ देखि २०५७।६।१३ सम्म
स्थानीय विकासमन्त्री -२०५७।१०।२५ देखि २०५८।४।६ सम्म
भ्रष्टाचारी ठहरिएका जोशीले भने–म माथि अन्याय भयो
जोशीको भनाई उनकै शब्दमा
विशेष
अदालतले भ्रष्टाचार ठहर गर्दै जेल सजाय सुनाएपछि कांग्रेस नेता एवं
पूर्वमन्त्री गोविन्दराज जोशीले आफूमाथि अन्याय भएको बताएका छन् ।फैसला आएपछि अनलाइनखबरसँग कुरकानी गर्दै जोशीले भन्दै सर्वोच्च अदालतमा पुनरावेदन दिने बताए । ‘म माथि पूर्ण रुपमा अन्याय भएको छ’ जोशीले भन्नुभयो-’यसविरुद्ध म सर्वोच्चमा पुनरावेदन दिन्छु ।’
जोशीको भनाई उनकै शब्दमा
यो मुद्धा शाहीकालमा हामी आन्दोलनमा रहेका बेला गिरिजाप्रसाद कोइराला, म लगायतका नेताहरुविरुद्ध अख्तियारले दायर गरेको हो । अहिले १० वर्षपछि आएर फैसला भएको छ । फैसला जे जस्तो आएपनि मैले कानुनको सम्मान गर्नैपर्छ । चिक्त बुझेन भने पुनरावलोकन गर्ने व्यवस्था छ ।
यो फैसलाले पूर्ण रुपमा म माथि अन्याय भएको छ । मैले सांसद भएपछि अख्तियारले समेत प्रमाणित गरिसकेको १ सय ३६ रोपनी जग्गा बेचेको छ । त्यसपछि मैले जोडेको भनेको एउटा गाडी मात्र हो । त्यसैले यसमा अन्यायपूर्ण फैसला भएको छ । अब म सर्वोच्चमा जान्छु ।
