विघटित
संविधानसभामा विपरीत धारको राजनीतिक दल राष्ट्रिय प्रजातन्त्र पार्टी
नेपालका अध्यक्ष कमल थापाले मुलुकको पछिल्लो राजनीतिक घटनाक्रममा सबैको
समान हैसियत रहेकाले विद्यमान राजनीतिक अन्योलता र शून्यतालाई अन्त्य गर्ने
विषयका वार्ताहरुमा आफ्नो पार्टीलाई पनि सहभागी गराउन माग गर्नुभएको छ ।
राप्रपा नेपालका अध्यक्ष थापाले हिजो
पार्टीको काठमाडौं उपत्यका स्तरीय अगुवा कार्यकर्ता भेलालाई सम्बोधन गर्दै
सो माग गर्नुभएको हो ।
सो क्रममा थापाले विद्यमान राजनीतिक
अन्योलको अन्त्य गर्न र संविधानसभा निर्वाचन सम्पन्न गर्न सर्वोच्च अदालतका
प्रधानन्यायाधीस अथवा पूर्व न्यायाधीसको अध्यक्षतामा स्वतन्त्र सरकार गठन
गर्नुपर्ने माग पनिगर्नुभयो ।
थापाले मुलुकमा प्रजातान्त्रिक
व्यवस्थालाई बलियो बनाउन निर्वाचनमा जानैपर्ने उल्लेख गर्दै लोकतन्त्रमा
जनताको अधिकारलाई सुनिश्चित गर्न निर्वाचन जरुरी हुन्छ भन्नुभयो ।
पार्टीका प्रचारप्रसार विभागका प्रमुख
राजाराम श्रेष्ठले संविधनसभाको विघटनपछि निष्पक्ष सरकार गठनका लागि जनदवाव
सिर्जना गर्न जिल्ला र क्षेत्रीयस्तरमा पार्टीले आमसभा, अन्तर्क्रिया,
प्रशिक्षणलगायतका कार्यक्रम आयोजना गर्ने जानकारी दिनुभयो ।
यसअघि गत शनिबार (जेठ २७ गते) राप्रपा
नेपालले राजधानीको खुलामञ्चमा विशाल आमसभा आयोजना गरेको थियो । नेपालको
आमसभामा अघिल्लो दिनको कांग्रेस, एमालेको आमसभा भन्दा बढी मानिसको
सहभागितालाई लिएर अहिले पनि चर्चा हुने गरेको छ ।
