महोत्तरीको बर्दिबास बजार बन्द ।।

विनोद पौडेल, बर्दिवास , जेष्ठ २७
महोत्तरीको बर्दिबासमा हिजो बिहान एक किसानको हत्या भएको विरोधमा स्थानियबासीले हिजो साँझदेखि बर्दिबास बजार तथा राजमाग पुर्ण रुपमा बन्द गराएका छन् । मृतक शवलाई बिचसडकमा तेस्र्याएर राजमार्ग तथा बजार बन्द गराएका हुन । बन्दलाई नियन्त्रणमा लिने क्रममा प्रदर्शनकारी र शसस्त्र प्रहरीबीच हिजो बेलुका दोहोरो भिडन्त भएको थियो । भिडलाई नियन्त्रणमा लिन प्रहरीले हवाई फायर तथा अश्रुग्यससमेत प्रहार गरेको थियो । घटनालाई ढकछोप गर्न खोजेको भन्दै आक्रोशित प्रर्दशनकारीले प्रहरी निरीक्षक रमेश बस्नेतमाथि हातपात गरेका छन् । हत्याको विषयमा थप अनुसन्धानका लागि प्रहरी नायब उपरीक्षकसहितको टोली आज बर्दिवास आइपुगेको छ । क्षतिपुर्तिको विषयलाई लिएर अहिले पीडित पक्ष र प्रहरीबीच उद्योग वाणिज्य सङ्घ बर्दिवासमा वार्ता चलिरहेको छ । खेतमा काम गर्न गएका बर्दिवास ३ निवासी ४० वर्षका मनोज भनिने खिन्तप्रसाद फुँयालको शव हिजो बिहान करिब ७ बजे बाँस घारीमा फेला परेको थियो । मृतक फुँयालको टाउको, कम्मर, आँखा तथा खुट्टामा चोट लागेको छ । हत्याको आसंकामा प्रहरीले मृतकका आफन्त बर्दिवास ३ का ४६ वर्षीय भोला फुयाँललाई अनुसन्धानका लागि पक्रउ गरेको जनाएको छ ।