काठमाडौ, असार ९ – अन्तर्राष्ट्रिय एकल महिला दिवस शनिवार मनाईंदैंछ ।
श्रीमान गुमाएका महिला र उनीहरुका बालबालिकाले भोग्नुपर्ने समस्यालाई विशेष
पहिचान दिन र उनीहरुको मानवअधिकार रक्षा र सशक्तिकरणको माध्यमबाट गरिबी कम
गर्ने अवसर प्रदान गर्न राष्ट्रसंघको आव्हानमा हरेक वर्ष जुन २३ तारिखमा
यो दिवस मनाउने गरिन्छ ।
संयुक्त राष्ट्रसंघको महासभाले सन् २०१० को डिसेम्बरमा २३ जुनलाई
अन्तर्राष्ट्रिय एकल महिला दिवसका रुपमा घोषणा गरेपछि सन् २०११ देखि दिवस
मनाउन लागिएको हो । लाखौं एकल महिला र उनीहरुमा आश्रितले भोगिरहेको गरीबी र
अन्यायलाई सम्बोधन गर्न राष्ट्रसंघले दिवस मनाउने निर्णय गरेको थियो ।
दिवसका अवसरमा सन्देश दिंदै राष्ट्रसंघका महासचिव बान की मूनले विश्वभरका
एकल महिलाका विरुद्ध हुने भेदभाव समाप्त पार्न र उनीहरुलाई मानवअधिकारको
उपभोग गर्नका लागि सक्षम बनाउनुपर्नेमा जोड दिनुभएको छ ।
संयुक्त राष्ट्रसंघले आजको दिनलाई विधवा दिवस भने पनि पछिल्लो समय विधवा
शब्द असहज भएको भन्दै एकल महिला दिवस भन्ने गरिएको छ । श्रीमान गुमाएका,
श्रीमान हराएका, सम्बन्ध विच्छेद गरेका र बिहे नगरी बसेका महिलालाई एकल
महिलाका रुपमा परिभाषित गरिएको छ ।
