आदिवासी जनजाति संयुक्त संघर्ष समितिले आह्वान गरेको तीन दिने बन्दको दोस्रो दिन आज पनि विहानैदेखि देशभरको जनजीवन प्रभावित भएको छ । राजधानीका सडकमा गाडीहरु कमै चलेका छन् । चोकचोकमा सुरक्षाकर्मी तैनाथ गरिएको छ । बन्दका कारण शैक्षिक संस्था, कलकारखाना, उद्योगधन्दा चलेका छैनन् । हिजोको बन्द हिंसात्मक र प्रेसलक्षित भएपछि आज बन्दकर्ता र सरकारबीच वार्ता हुने बताइएको छ ।
ललितपुरको ग्वार्को, इमाडोललगायतका क्षेत्र बढी तनावग्रस्त बनेका छन् । ती क्षेत्रमा बन्दकर्ता र बन्द खुलाउनेबीच झडप भएको छ । झडपमा थुप्रैं व्यक्ति घाइते बनेका छन् । दुई पक्षबीच ढुंगा हानाहान भएर क्षति हुने अवस्था आएपछि स्थिति नियन्त्रणमा लिन प्रहरीले केही सेल अश्रु ग्याँस प्रहार गरेको छ । घरेलु हतियारसहित भेला भएकाबीचको झडपमा घाइते भएकाको उद्धारका लागि एम्बुलेन्स पुग्न समेत धौं–धौं परेको छ ।
काठमाडौंको बालाजु, गोंगबु, महाराजगञ्ज, चाबेल, गौशाला, बानेश्वर, कलंकी, कीर्तिपुर लगायतका क्षेत्र अलि बढी आक्रामक बनेको छ । नयाँबजारको धारा गल्लीमा विहान खुलेका पसल बन्दकर्ताले तोडफोड गरेको स्थानीयवासीले बताएका छन् । ११ प्रदेशको सहमति खारेजी, पहिचानसहितको संघीयता, आदिवासी जनजातिका हक अधिकार सुनिश्चित गर्नुपर्ने लगायतका माग राखेर जनजातिहरु आन्दोलनमा छन् ।
