वैशाख ३१, काठमाण्डौं
उपराष्ट्रपति परमानन्द झाले नेपाल
प्राकृतिकरूपमा धनी भए पनि यसभित्रको प्रचुरतालाई सदुपयोग गर्न नसकिएको
बताउनुभएको छ । वातावरण र विकासका लागि अन्तर्राष्ट्रिय प्रतिष्ठान
(आइआइइडी) र वातावरणीय व्यवस्थापन र दिगो विकासका लागि एसियाली केन्द्र
(एइम्स) नेपालले आज राजधानीमा आयोजित ‘भविष्यको सुरक्षा र वातावरणको बचाउ’
नामक पुस्तक लोकार्पण कार्यक्रममा उपराष्ट्रपति झाले तराईका कतिपय जिल्लामा
वन जङ्गल विनासका कारण सिंचाइ हुन नसकी सुख्खाको मारमा त्यहाँका जनता
परिरहेको बताउनुभयो । कार्यक्रममा पोखरा विश्वविद्यालयका उपकुलपति डा
खगेन्द्रप्रसाद भट्टराईले वातावरणीय मुद्दा विश्वव्यापी मुद्दा भएको भन्दै
विकास र वातावरणबीच सन्तुलन कायम गर्न तथा हरित अर्थतन्त्रमा लगानी गर्न
ध्यान दिनुपर्ने बताउनुभयो । एइम्सका अध्यक्ष डा. रामबहादुर खड्काले
नेपालमा अलग्गै वातावरण मन्त्रालय गठन हुनुपर्ने माग गर्नुभयो ।
