बिनोद खड्का
एकादेशमा एउटा देश थियो । त्यो देशले
विश्व मानचित्रमा गरीब देशको बिल्ला पाएको थियो । देशको एउटा पाटो समय
समयमा अनिकालको शिकार हुनथ्यो । तर त्यहाँको कुल जनसंख्याको एउटा हिस्सा
अकुत धन सम्पत्तिका मालिक थिए । तीनमा कम्तीमा पनि एकपटक मन्त्री भईसकेका
मानिसहरु, सर्वसाधारणसंग सरोकार राख्ने निकायमा काम गर्ने घुस्याहा र
भ्रष्टाचारी सरकारी कर्मचारीहरु, कालोधन्दा गर्ने काला उद्यमी व्यापारीलाई
सघाउने राजश्व क्षेत्रमा काम गर्ने कर्मचारीहरु, आफ्नो फाईदाका लागी गलत
प्रयोजनमा पनि श्रृण प्रवाह गर्ने बैंक मेनेजरहरु, व्यभिचारी भ्रष्ट र
दुष्ट नेताहरु तथा तीनका अपराधिक प्रवृतिलाई सघाउने वा तीनका सहयोगले ठगी,
दलाली धन्दा गर्ने तथा हत्या, लुट, अपहरण, र गैरकानुनी रुपमा अर्काका घर
सम्पत्ति कब्जा गर्ने जस्ता गम्भिर सामाजिक अपराधीहरु, कालो तथा असामाजिक
धन्दा गर्ने व्यापारीहरु, तथा देशमा कानुन पालना गराउने जीम्मा लिएका तर
आफ्नो जीम्मेवारी पुरा नगर्ने वा अख्तियार दुरुपयोग गर्ने सरकारी निकायका
हाकिम र तीनका गलत काममा सहयोग गर्ने कर्मचारीहरु । यो वर्गको त्यो देशमा
बोलवाला थियो । उनीहरुले जे चाह्यो त्यही हुँनथ्यो । उनीहरु सरकारी
सम्पत्ति र अधिकारको चरम दुरुपयोग गर्थे । उनीहरु मीठो खान्थे राम्रो
लगाउथे र तीनीहरुमध्ये धेरै चाँही महंगा कारहरुमा यताउता गर्थे । उनीहरुको
त्यो श्रोत नखुलेको कालो सम्पत्तिलाई सरकारले केही कर लिएर सेतो बनाईदिदै
देशमा भ्रष्टाचारलाई पेशाकै रुपमा अझै विकास गर्दै थियो । अन्तमा सबै काला
धनहरु “कमाई“ का नाममा रुपान्तरण हुँन्थे रे । यही वर्गको पहुँचलाई मध्यनजर
गरेर ठूला ठूला महंगा अस्पताल, नर्सिग होम, र सपिंग कम्पलेक्सहरुको पनि
विकास भएको थियो ।
एउटा ठूलो वर्ग जसोतसो जीवन धान्ने वर्ग
थियो र बाँकी पुरै विपन्न । तीनलाई शान्तिपूर्ण जीवनयापन गर्ने रहर थियो ।
उनीहरु आफ्नो गुजाराको दैनिकीका लागी शान्तिपूर्ण जीवनयापन अपरिहार्य
ठान्थे । यीनका रहर पुरा गर्न भगवानले त्यही देशको एउटा गाँउमा बस्ने
मायादेवी नामकी आईमाईका गर्भमा अर्को बुद्ध पठाईदिए । बीस बर्ष भईसक्यो रे
अझै ती आईमाईले गर्भदान गर्नै सकेकी छैनन रे । आज पनि कतिपय मान्छेहरु उनको
गर्भदानका आशामा छन रे ।
यो कुरा थाहा पाएकी भगवान पत्नीले
भगवानसंग बिन्ति गर्नु भएछ किन अर्को बुद्ध जन्मिएनन । तब भगवानलाई पनि रीस
उठेछ रीसाउँदै भनेछन “ती देशका ती मूर्ख जनताहरुले मेरो चाकडी गर्ने कि ती
भ्रष्ट नेताहरुको चाकडी गर्ने ? जबसम्म तीनले भ्रष्ट नेताहरुको चाकडी
गरिरहन्छन म तीनलाई सहयोग गर्न सक्दिन”
भगवान पत्नीले मुश्कुराउँदै बिन्ती गर्नु
भएछ “प्रभु, उनीहरु हजुरकै भजन गर्छन, मन्दिर जान्छन, घण्टौ लाईनमा बसेर
हजुरकै दर्शन गर्छन । त्यो भन्दा बढी उनीहरुले के नै गर्न सक्छन र प्रभु?”
भगवानले मुश्कुराउदै नै जवाफ दिनु भएछ “ती
त सन्तान माग्छन, धन सम्पत्ति माग्छन, पति माग्छन, पत्नी माग्छन, यो भए यो
दिउँला भनेर मलाई घुस भाक्लछन । हेर त पृथ्वीतलमा पुगेर त्यहाँ एउटा पनि
मान्छेले मसंग बुद्ध माग्दैन ।” भगवान पत्नीले सुईयय सुस्केरा हाल्नु भएछ ।
Khadkabinod02@yahoo.com
