तनहुँ खबर सम्बदाता काठमाडौं, जेठ ११-
देउवा म्याद थपका पक्षमाकांग्रेस वरिष्ठ नेता शेरबहादुर देउवाले संविधानको ९० प्रतिशत काम सकिएकाले १० प्रतिशत काम सक्न केही समय संविधानसभाको म्याद थप्नुपर्ने धारणा राखेका छन्।
माओवादीले जेठ १४ भित्र संविधानमा सहमति गर्ने सम्भावना नरहेको उल्लेख गर्दै उनले म्याद थपबाहेक विकल्प नभएको बताए।
बुधबार सिंहदरबारमा बसेको देउवा पक्षीय केन्द्रीय सदस्य र सभासदहरूको संयुक्त भेलामा उनले म्याद थपबारे कुनै धारणा नराखे पनि निकट नेताहरूसँग म्याद थपबाहेक विकल्प नभएको बताएका हुन्। 'संविधानको केही काम मात्रै बाँकी रहेको बेला चार वर्षसम्म भएका काम खेर जानेगरी संविधानसभा विघटन गर्नतिर लाग्नु हुँदैन,' देउवालाई उद्धृत गर्दै उनी निकट एक उच्च नेताले नागरिकसँग भने, 'विकल्प नभएकाले तीन महिना म्याद थपका लागि अन्तिमपटक पार्टीले साथ दिनुपर्छ।'
देउवा पक्षका केन्द्रीय सदस्य र सभासदले पनि म्याद थप गर्नुपर्ने बाध्यात्मक विकल्प भएको धारणा राखेका थिए।
