शैलेन्द्र कठायत,
दोहा, २३ फाल्गुन । हरेक साता कतारमा चलचित्रको प्रिमियर हुने गरेको छ । यहि क्रमलाई निरन्तरता दिंदै आउँदो शुक्रबार पनि चलचित्र ुबधाई छ तिमीलाईु को पहिलो स्क्रिनिङ कतारको दोहामा गरिंदैछ ।
उदय सुब्बाले निर्देशन गरेको सो चलचित्र कतारको दोहा स्थित गल्फ सिनेमाहलमा प्रिमियर गरिंदैछ । सो प्रिमियर शोमा निर्देशक सुब्बा र नवनायक बिष्णु कार्कीको उपस्थिती रहने छ । आयोजक मध्यका एक भानु शर्माले दिएको जानकारी अनुसार चलचित्र दिउँसो साढे दुई बजे स्क्रिनिङ गरिनेछ । चलचित्र हेर्न आउने दर्शकका लागि आयोजकले आवतजावतको पनि सुबिधा दिएको छ । अल अत्तिया, ल्याण्डमार्क र सनैया ४७ बाट दिउँसो १ बजे बस छुट्ने भएकाले दर्शकहरूलाई आफ्नो सुबिधा पर्ने ठाउँ पुगी चलचित्र हेर्न आउन आयोजकले आग्रह गरेको छ ।
राज न्यौपानेको प्रस्तुतीमा सुरेन्द्र कुमार कुरूम्बाङ, कृष्णमणी कुईंकेल र रक्षा न्यौपानेले संयुक्त रूपमा निर्माण गरेको सो चलचित्रमा राजेश हमाल, झरना थापा, सुनिल थापा, सुवास मेचे, विष्णु कार्की लगायतले अभिनय गरेका छन् । प्रिमियरका लागि टिकट दर ५०, २५ र २० कतारी रियाल राखिएको छ ।
