रौतहट, १५ चैत । माओवादी सभासद् प्रेमबहादुर पुलामीको एसएलसी परीक्षा दिने नक्कली परीक्षार्थी बुधबार पक्राउ परेका छन् ।
रौतहटको जुडिबेलास्थित जुडिबेला उच्च मावि परीक्षा केन्द्रबाट ऐच्छिक गणित विषयको परीक्षा दिइरहेका साहित्य लामालाई सशस्त्र प्रहरी टोलीले पक्राउ गरेको हो । पुलामी मकवानपुर क्षेत्र नम्वर २ बाट प्रत्यक्ष निर्वाचित सभासद् हुन् ।
मकवानपुर नामटार- ८ स्थायी घर भएका साहित्यसँग आफ्नो र सभासद् पुलामीको प्रवेश पत्र भेटिएको जिल्ला शिक्षा कार्यालय रौतहटका विद्यालय निरीक्षक पशुपति महतोले जानकारी दिए । साहित्यले गत वर्ष नै एसएलसी उत्तीर्ण भएका थिए ।प्रहरीले शिक्षा नियमावलीअनुसार नक्कली परीक्षार्थीलाई कारबाही गर्ने जनाएको छ ।
पुलामी संविधानसभाको राष्ट्रिय हितको संरक्षण समितिमा छन् भने संसद्मा सार्वजनिक लेखा समितिमा छन् । तत्कालिन अर्थमन्त्री सुरेन्द्र पाण्डेले बजेट पेश गर्न रोस्ट्रममा जाँदा ब्रिफकेस खोस्ने घटनामा उनी पनि संलग्न थिए ।
गत वर्षको एसएलसी परीक्षामा एमाले सभासद् किरणकुमारी यादवले आफ्नो नामबाट छोरीलाई परीक्षा दिन लगाएकी थिइन् ।
शिक्षकहरु भागाभाग
नक्कली परीक्षार्थी पक्राउ पर्न थालेपछि जुडिबेला उच्च मावि परीक्षा केन्द्रका शिक्षकहरु भागाभाग भएका छन् । स्रोतका अनुसार पास गराइदिने भन्दै १५ देखि ५० हजार रुपैयाँ दिएर उनीहरुले अन्य स्थानका विद्यार्थीलाई यस उच्च माविमा फर्म भराएका थिए । सभासद्का नक्कली परीक्षार्थीसहित यहाँबाट २९ नक्कली परीक्षार्थी पक्राउ परेका छन् । श्रोत :शिव पुरी /कान्तिपुर
