अमृत सुबेदी
पोखरा,२३ फागुन । लेखनाथको सिसुवा शान्ती चोक वडा नम्बर ८ स्थित एक किराना पसलमा आगलागी हुँदा ३ जनाको मृत्यु भएको छ । सिसुवा स्थित गंगाराम तिमिल्सिनाको घरमा किराना पसल सञ्चालन गर्दे आएका शिव ओझाको पसलमा आगलागी हुँदा उनकी ३२ बर्षिया श्रीमती सिता ओझा, १३ बर्षिया जेठी छोरी सिमाना र ८ बर्षीय स्वतिका ओझाको मृत्यु भएको हाम्रा सहकर्मी सागरराज तिमल्सेनाले जानकारी गराए ।
जेठी छोरी सिमानाको घटनास्थलमै र कान्छी छोरी स्वस्तिकाको मणिपाल शिक्षण अस्पताल तथा आमा सिताको पश्चिमाञ्चल क्षेत्रिय अस्पतालमा उपचारका क्रममा मृत्यु भएको हो । सोमबार राती करिब साढे १ बजेतिर लागेको आगो स्थानीयवासी र प्रहरीको सहयोगमा राती २ बजे तिर नियन्त्रणमा आएको थियो ।
घटनाको अनुसन्धान भैरहेको डाँडाकोनाक प्रहरीचौकीका प्रहरी निरिक्षक कृष्ण अर्यालले बताए । अहिले नै केहि भन्न सक्ने अवस्थामा छैनौ— प्रहरी निरिक्षक अर्यालले भने —अनुसन्धान पछि मात्र अन्य कुरा बाहिर ल्याउने छौ । कोठामा रहेको सिरकमा मट्तिेलको गन्ध आएकाले आत्महत्या हो की भन्ने अनुमान प्रहरीले गरेको छ ।
किराना पसलसँगै रहेको कोठामा श्रीमान शिव सुतेका थिए भने श्रीमती सिता भने पसलमा २ छोरीलाई लिएर सुतेकी थिइन् । यस अघाडी श्रीमान श्रीमती एउटै कोठामा सुत्ने गरेको तर गएराती वेग्लावैग्लै सुतेको र कोठामा पनि मट्टितेलको गन्ध आएकाले घटना शंकास्पद भएको प्रहरीले जनाएको छ । प्रहरीले श्रीमान शिव ओझालाइ नियन्त्रणमा लिएर घटनाको अनुसन्धान भैरहेको जनाएको छ ।
