रवि रोषी ,दोहा ५ मार्च ।
नेपाल र सुडान बीच भएको भलिवल फाईनल खेलमा अन्ततः सुडान विजयी भएको छ भने उपविजेताको रुपमा नेपाल चित्त बुझाउन बाध्य भएको छ । विगत ८ महिनादेखि कतारमा कम्युनिटी लिग भलिवल खेल अन्तर्गत हुँदै आएको लीग प्रतियोगितामा नेपाल फाईनल खेलमा उपविजेताको रुपमा चित्त बुझाउन बाध्य भएको छ भने तृतिय स्थान भारतले हात पार्न सफल भएको छ । विगतको समयमा राम्रो खेल प्रदर्शन गर्दै आएको नेपालले फाईनलको दिन त्यति उत्कृष्ट खेल देखाउन सकेन । यद्यपि नेपालले द्धितिय स्थान हासिल गर्न सक्नु नेपाल र नेपालीको लागि गौरवको बिषय हा,े नेपाली कम्युनिटीको तर्फबाट अगुवा सागर नेपालले बताए ।
सुडानले फाईनल खेलमा १३ २५, २३ २५, १८ २५ को सजिलो सेटमा नेपाललाई लगातार जित्न सफल भएको छ । खेल प्रविधीमा नेपाल अलि कमजोर रहेको बताउँदै आगामी समयमा यसलाई सुधार्नुपर्ने र सुधार्दै आउने कुरा प्रमुख प्रशिक्षक नगेन्द्र पौडेलले जानकारी दिए । नेपाल र सुडानबीच फाईनल खेल सुरु हुनु अगाडि नेपाली दुतावासको तर्फबाट कतार भलिवल एसोसिएसन, कतार भलिवल एसोसिएसनका अध्यक्ष, कतार भलिवल लीग कोअर्डिनेटर तथा सकोअर्डिनेटरलाई नेपाली दुतावासका कार्यवाहक राजदुत जय बहादुर राईले कलात्मक काष्ठकलाको आँखी झ्याल (लव अफ टोकन) प्रदान गरेका थिए । ८ हजारको हाराहारीमा उपस्थित नेपाली दर्शकहरुको उपस्थिती देखेर कतार भलिवल एसोसिएसनले नेपालीहरुको खेल प्रतिको झुकावलाई सह्राहना गरेका थिए ।
खेल समापन तथा पदक वितरणको क्रममा नेपाली दुतावासलाई कतार भलिवल एसोसिएसनको तर्फबाट सम्मान स्वरुप मायाको चिनो प्रदान गरेको थियो भने समुदायको तर्फबाट उत्कृष्ट भूमिका निर्वाह गरेबापत नेपाली समुदायका अगुवा सागर नेपाललाइ मस्ट कोअपरेटिभ कम्युनिटी लिडरको उपाधी सहित लव अफ टोकन प्रदान गरी सम्मान गरिएको थियो ।
नेपालको तर्फबाट खेल्ने खेलाडीहरुमा टिम क्याप्टेन भिम गुरुङ थिए ।
अन्य खेलाडीहरुमा प्रेम छन्त्याल, नारायण थनेत चौधरी, मेख गुरुङ, सुनिल नेपाली, विजय सेन, लेखनाथ लम्साल, सुरज लुईंटेल, खड्ग बहादुर मल्ल, सन्तोष बि.क. र मान बहादुर थापा रहेका थिए भने नेपालको तर्फबाट खेल्ने विदेशी पाहुना खेलाडीहरुमा क्युवाली नागरिक हिरोशी र डियाग रहेका थिए । नेपाली टिमका प्रमुख कोच नगेन्द्र पौडेल, सहायक कोच मदन गुरुङ, ट्र्ेनर राम गुरुङलाई सोही अवसरमा आफ्नो क्षेत्रबाट निभाएको भूमिकाको कदर गर्दै सम्मान गरिएको थियो । लीग चरणको खेलको सुरुवात क्रम देखि अन्त्य सम्म अग्रणी भूमिका निर्वाह गर्नेहरुमा फस्ट एडमा कमल गुरुङ थिए भने अन्य विशिष्ट सहयोग पुर्याउनेहरुमा नरेन्द्र सेन, नरेन्द्र भाट, उमेश अधिकारी, प्रेम गुरुङ र हिरा के.सी. रहेका थिए ।
“८ देश अन्तर्गत सुरुवात गरिएको कम्युनिटी भलिवल लीग प्रतियोगितामा नेपाली दर्शकहरुको भारी उपस्थितीले गर्दा आउँदो २०२२ को फिफा विश्वकपको आयोजक कतारलाई दर्शकहरुको पहिचान गर्न सजिलो भएको छ । हामीले नेपाल र नेपालीलाई विश्वकपको विशेष दर्शकको रुपमा पनि अब गम्भीर बिचार गरी विशेष अवसर प्रदान गर्नुपर्ने हो कि भनी सोच्न बाध्य बनाएको छ,” भलिवलको अन्तर्राष्ट्रिय निकाय फेडरेशन इन्टरनेशनल डि भलिवल (एफआईभिवी) प्रशिक्षक आयोगका सदस्य तथा एफआईभिबि प्रशिक्षक एबं अन्तर्राष्ट्रिय बीच भलिवलका इन्स्ट्रक्टर समेत रहेका हुसेन इमाम अलीले बताए । 
नेपाली खेलाडीहरुको खेलप्रतिको रुचि र लगनलाई देखेर बढिमा ६ जना नेपाली खेलाडीहरुलाई कतार भलिवल एसोसिएसनले कतारको क्लवमा खेलाउन अनुबन्ध गराउन सक्ने अवसर प्रदान गरेको पनि अगुवा सागर नेपालले खुलासा गरे । तर भलिवल खेलाडीको खेल, उचाई तथा उमेर यि सवै मापदण्ड भित्र नेपालबाट आउने खेलाडीहरु योग्य ठहरिनु पर्नेछ ।
अगुवा नेपालले अरु थप भने, यूरोपियन क्लवले दिने जत्तिकै सेवा, सुविधा अनुबन्धित नेपाली खेलाडीलाई प्राप्त हुनेछ र यो अवसरको बाटो खोल्ने श्रेय बडो मेहनतको साथ उत्कृष्ट खेल प्रदर्शन गरी फाईनल सम्म पुग्न सफल नेपाली भलिवल खेलाडीहरुलाई जानेछ, अन्त्यमा नेपालले भने ।
