काठमाडौ,
फाल्गुन ११ - बाणिज्य तथा आपूर्ति मन्त्री लेखराज भट्टले आयल निगमले माग अनुसार प्रयाप्त आपूर्ति गरिरहेको भए पनि ब्यापारीहरुले कालो बजारी गर्न कृतिम अभाव सृजना गरेको आरोप लगाएका छन् ।
रिपोर्टर्स क्लब नेपालले विहीबार आयोजना गरेको साक्षात्कारमा मन्त्री भट्टले आयल निगमले माग अनुसारको डिजेल, पेट्रोल, मट्टीतेल र ग्यासँको आपूर्ति गरिरहँदा समेत बजारमा अभाव हुनुले ब्यापारीहरुले कालाबजारीकोलागी कृतिम अभाव सृजना गरेको प्रष्ट भएको ठोकुवा गरे ।
उनले ग्यासँ बुलेटमा राखेर सिलिण्डरमा नभरी उद्योगहरुले कृतिम अभाव सृजना गरेको बताए । उनले पेट्रोल पम्पले पनि बाडेर आधा भएपछि भल्भ बन्द गरेर सकियो भनि लुकाएर अभाव सृजना गर्ने गरेको पाईएको जानकारी दिदै कृतिम अभाव सृजना गरेर कालाबजारी गर्नेलाई अब सरकारले कुनै पनि हालतमा नछाडने चेतावनी दिए । उनले थपे–मलाई थाहाँ छ कुन कुन पम्प र ग्यासँ फिलिङ स्टेशनले लुकाएर कालाबजारी गरेका छन । उनीहरुले अब आपूर्ति सुचारु नगरे कसैलाई पनि म छाडदिन । उनले मुनाफा खोरी र सरकारलाई बदनाम गराउने योजनाका साथ अभाव सृजना गरिएको आरोप लगाउँदै अब कडा अनुगमन गरी कालाबजारी गर्ने सबैलाई कारवाही गर्ने स्पष्ट पारे । उनले कालोबजारी गर्ने र कम ग्यास फिलिङ गर्ने हिमाल ग्यासँका प्रवन्धकलाई थुनामा राखेर कारवाही सुरु गरिएको बताउँदै मन्त्रालयले ब्यापारीहरुलाई अभाव अन्त्यकोलागी अन्तिम अल्टिमेटम दिने र सो अवधीमा समेत सहज नपारे कारवाही थाल्ने बताए ।
उनले ग्यासको सहज आपूर्तिकोलागी ग्यासँ उद्योगलाई सिलिण्डर अनुसार भन्दा पनि सिलिण्डरमा फिलिङ गर्न सक्ने क्षमताको अधारमा ग्यासँ दिने र उपभोक्ताकोलागी रातो, ब्यवसायीक प्रयोजनकालागी निलो कार्ड मार्फत ग्यासँको आपुर्ति सहज बनाउने योजनामा मन्त्रालय लागेको बताए ।
साक्षात्कारमा मन्त्री भट्टले शान्ति प्रक्रिया र संविधान निर्माणमा सबै राजनीतिक दलको ध्यान केन्द्रीत गर्न पनि पेट्रोलियम पदार्थ सहज गर्न अतिआवश्यक भएको भन्दै त्यसकालागी जेठ १४ गतेसम्म आपूर्ति सहज पार्न ९ अर्ब रुपैया सरकारसँग माग गर्ने तयारमा मन्त्रालय रहेको जानकारी दिए ।
उनले भने–जेठसम्म आपूर्ति सहज बनाउन ९ अर्ब रुपैया आवश्यक छ । त्यो नभए सहज आपूर्ति बनाउन सकिदैन । उनले पेट्रोलियम पदार्थको मुल्य समायोजन गरी आयल निगमको घाटा कम गरी आपूर्ति सहज बनाउन आयल निगमको ऋणलाई पुजिकृत गर्नु पर्ने, अनुगमनलाई तिब्रता दिनु पर्ने र कर प्रणालीमा पुनरावलोकन गर्नु पर्ने बताए । एन एम खबर
