भोलाराज पौडेल,
फागुन ११ गते ।
नुवाकोटको नर्जामण्डपमा एक व्यक्तिको खुकुरीले रेटेर हत्या भएको छ । क्षेत्र नं. २ को नर्जामण्डप गाविस वडा नंं ९ छाप गैरीगाउँमा ४८ वर्षका शेरबहादुर तामाङको हत्या भएको हो । घरमा एक्लै भएका बेला खुकुरीले रेटेर हत्या भएको अवस्थामा आज बिहान शव भेटिएको उनका ज्वाइँ सीताराम तामाङले बताउनुभयो । हत्या कसले र किन ग¥यो भन्ने खुल्न सकेको छैन । राति घरबाहिर पिढीको खाटमा सुतिरहेको अवस्था हत्या भएको बताइएको छ ।
मृतक तामाङका श्रीमति लच्याङ गाविसमा रहेको अर्को घरमा रहेको, जेठो छोरा काठमाडौंमा र माइलो र साहिँलो मलेसियामा, कान्छो छोरो भारतमा रहेकाले कसैले पैसाको लोभमा उनी एक्लै भएको अवस्थामा हत्या भएको हुनसक्ने स्थानीयबासिन्दाले शङ्का गरेका छन् । मृतक तामाङको मृत शरीर घरको पिढीमा रहेको खाटमा रगतपक्ष अवस्थामा भेटिएको हो । घटनास्थल सदरमुकाम विदुरबाट ३० किलोमिटर उत्तरपूर्वमा रहेको छ ।
