आश गुरुङ, लमजुङ, माघ २२ गते ।
लमजुङ सदरमुकाम वेसीशहरस्थित बेसीशहर खानेपानी तथा सरसफाई उपभोक्ता समितिले ५ जना कर्मचारीलाई निस्कासन गरेपछि यसको विरोधमा राजनीतिक दलले समेत आन्दोलन थालेकाछन् ।
आन्दोलनको पहिलो चरणस्वरुप आज आईतवार नेकपा एमाले वेसीशहर नगर संगठन कमिटीले खानेपानी तथा सरसफाई उपभोक्ता समितिका अध्यक्ष कृष्णबहादुर अधिकारीको कुर्ची जलाएकाछन् ।
अध्यक्ष अधिकारीको राजीनामा माग गर्दै प्रदर्शनमा उत्रिएका एमाले समर्थितहरुले कार्यालयमा गएर कुर्ची र नामप्लेट ल्याई भीमसेनस्थान चोकमा ल्याएर जलाएका थिए । उनीहरुले खानेपानी कार्यालयमा तालाबन्दी समेत गरेकाछन् ।
खानेपानीमा कार्यरत ५ जना कर्मचारीको पुनर्बहाली गर्नुपर्ने, संस्थाभित्रको आर्थिक अनियमितताको छानविन गर्नुपर्ने, खानेपानी अध्यक्ष अधिकारीले राजीनामा दिनुपर्ने माग राख्दै उनीहरुले अनिश्चितकालीन तालाबन्दी गरेका हुन् । एमाले नगरकमिटीका अध्यक्ष गुमानसिंह अर्यालको नेतृत्वमा एमाले राष्ट्रिय परिषद् सदस्य मायानाथ अधिकारी र प्रेम घले, जिल्ला अध्यक्ष जमिन्द्रमान घलेसम्मिलित टोलीले खानेपानी अध्यक्षविरुद्ध नाराबाजी गर्नुका साथै अध्यक्ष कृष्णबहादुर अधिकारीले आर्थिक अनियमितता गरेको आरोप लगाउँदै सदरमुकाम वेसीशहरको मनाङे चौतारावाट शेराबजारसम्म प्रदर्शन गरेका थिए ।खानेपानी अध्यक्षले विधान बिपरित उपभोक्तावाट उठाएको रकमवाट खानेपानी उद्योगको नामसारी गरेको, विना कारण संस्थामा रहेका आदिवासी जनजाति, दलित, महिला, एकल महिला र अपांगता भएका ५ जना कर्मचारीलाई निस्कासन गरेको एमालेले जनाएको छ ।
अन्याय भएको जुनसुकै संस्था र ठाउँमा त्यसका विरुद्ध एमाले उभिने वताउँदै एमाले वेसीशहर नगर कमिटीले खानेपानी उपभोक्ता समितिका अध्यक्ष अधिकारीको राजीनामा नआउँदासम्म आन्दोलन जारी राख्ने जनाएको छ । एमालेले आन्दोलन जारी रहँदा सम्म अन्य कर्मचारीलाई मिटर रिडिङ नगर्न समेत आग्रह गरेको छ ।
यसैगरि एमालेको नेतृत्वमा भोलि सोमवार २३ गते मावनअधिकारवादी संघसंस्थासंग छलफल र विषयलाई राष्ट्रियकरण गर्ने, २४ गते खानेपानी कार्यालयका अन्य कर्मचारीहरुसंग एक्यबद्धताका लागि छलफल गर्ने, २५ गते सांकेतिक चक्काजाम गर्ने, २८ गते साधारण सभा अवरोध गर्ने र २९ गते दलित, युवा, विद्यार्थी र महिलाको विरोध कार्यक्रम सार्वजनिक गरेको छ ।
यसैगरि, आफ्ना जनजाति कर्मचारीलाई निकालिएको विरोधमा आदिवासी जनजाति महासंघ समन्वय परिषद् लमजुङले पनि आफ्ना आन्दोलनको कार्यक्रम सार्वजनिक गरेको छ । महासंघले आगामी फागुन १ गतेदेखि अनिश्चितकालीन लमजुङ बन्दको घोषणा गरेको छ ।
खानेपानी समितिले विना कारण पूर्वाग्रही भएर कम्प्युटर अपरेटर सहज कुमार घले, मिटर रिडर निर्मला अधिकारी, डिलमाया खत्री, चौकीदार रेशम बहादुर क्षेत्री र हरिबहादुर विकलाई हटाएपछि कर्मचारीहरु मंसिर २२ गतेदेखि आन्दोलनमा उत्रिएकाछन् । कर्मचारीको आन्दोलनप्रति एक्यबद्धता जनाउँदै आदिवासी जनजाति महासंघ, युवा र विद्यार्थी महासंघ हुँदै १ महिनापछि नेकपा एमाले वेसीशहर नगरकमिटीले समेत आन्दोलन थालेका हुन् ।
