काठमान्डौ
माघ २६ गते ।
व्यवस्थापिका संसदको सार्वजानिक लेखा समितिले आधुनिक प्रविधि थपेर भएपनि मोवाइलफोनको गुणस्तर सुधारगर्न नेपाल टेलिकम र संचार मन्त्रालयलाई निर्देशन दिएको छ । संचार मन्त्रालयका सचिव र टेलिकमका अधिकारीहरुसँगको छलफलपछि लेखाले मोबाइलका बिटिएस टावरमा सोलारको व्यवस्था गर्न गर्न निर्देशन दिएको हो । सोलार जडान गर्दा सार्वजानिक खरिद ऐन अन्तरगत पारदर्शी ढंगले उपकरण खरिद गर्न पनि निर्देशन दिएको सभापति रामकृष्ण यादवले जानकारी दिनुभयो ।
बैठकमा सभासदहरुले नेपाल टेलिकमको गुणस्तर झनै खस्किंदै गएको बताएका थिए । टेलिकमका महाप्रबन्धक अमरनाथ सिंहले भने गुणस्तरप्रति आफूपनि सन्तुष्ट नभएको भएपनि विगतको तुलनामा धेरै नै सुधार आएको दावी गर्नुभयो । लोडसेडिङका कारण बिटिएसको ब्याट्री चार्ज हुन नपाउँदा नेटवर्क समस्या र मोबाइलको गुणस्तरमा कमी आएको टेलिकम अधिकारीहरुले बताएका थिए । टेलिकमले यसै आर्थिक बर्षमा देशभरका ४ सय ५५ बिटिएसमा सोलार जोड्ने योजना बनाएको छ । सभासदहरुले आगामी केहि वर्ष लोडसेडिङ कायम रहने भएकोले सबै बिटिएसमा सोलार जोड्न सुझाव दिएका हुन ।
