काठमाडौं फागुन ,१३ गते ।
लोकगायिकाको पहिचान बनाएकी गायिका सुनिता दुलालले आधुनिक गायनमा फड्को मारेकी छन् । सुनिताले आफ्नो एघारौं एल्वम ‘सिरमा फूल’ ल्याएकी छन् । लोक एल्वममै अल्झिँदै आएकी सुनिताको यो लोकआधुनिक एल्वम हो । यसभन्दा अगाडि १० लोक एल्वम स्रोतामाझ ल्याइसकेकी सुनिताले भनिन्, ‘पहिलेदेखि नै आधुनिक एल्वम निकाल्ने सोच थियो, बल्ल पुरा भयो ।’
गायिका सुनिताले नेपाली संगीत क्षेत्रमा दशक बिताइसकेकी छन् । यो दशकको अवधिमा उनले दशै एल्वम स्रोतालाई पस्किन सफल भएकी छन् । मायालुले झल्को दिइरहने, चेलीको माइती घर, अब त मैले िनझसम्का लगाउँछु, मेरै दीलमा फुल्यौ निरमाया लगायतका एल्वमहरु प्रकाशित गरेर लोक गायनमा चर्चा बटुलेकी सुनिता आधुनिक गायनबाट पनि उत्ति नै आशावादी छिन् । सुनिता भन्छिन्, ‘मेरो झुकान लोक गायनमा बढी भएपनि सबै किसिमका गीत गाउन सक्छु । त्यसैले आफ्नो यो आधुनिक एल्वमप्रति पनि आशावादी छु ।’रेडियो जंकी हुँदै गायनमा प्रवेश गरेकी सुनिता पछिल्लो समयमा चलचित्र पाश्र्व गायनमा पनि ब्यस्त हुन थालेकी छन् । ‘मेरो लागाव त लोक गीतमै छ, तैपनि चलचित्र गीत पनि गाउदै आएकी छु’ सुनिताले भनिन्, ‘एफएममा लोक गीत सम्बन्धि नै कार्यक्रम चलाएकी हुँदा पनि लोक गायनमा आकर्षित भएकी हुँ ।’ लोक गीत नेपाली संगीतको आधार भएको भएको पनि सुनिताले बताइन् ।
त्यसो सुनिताले अहिले पनि एक टेलिभिजनमा लोक गीतको कार्यक्रम संचालन गर्दै आएकी छन् । ईमेज टेलिभिजनबाट प्रसारण हुँदै आएको ‘उकाली ओराली’ को उनी प्रस्तोता हुन् । तर गायनमै बढी ब्यस्त हुन थालेकोले कार्यक्रम छोड्ने मनस्थितिमा सुनिता पुगेकी छन् । उनले भनिन्, ‘गायन र कार्यक्रमलाई समय दिन पर्दा निकै गाह्रो भइरहेको छ ।, त्यसैले कार्यक्रम छोड्ने मनस्थितिमा पुगेकी छु ।’ उनले आधुनिक गायनलाई निरन्तरता दिने पनि बताइन् । ‘विदेशमा लोक गीतको क्रेज राम्रो भएपनि आधुनिक गायनलाई पनि निरन्तरता दिनेछु’ उनले भनिन्, ‘किनकि मेरो आधुनिक गायन पनि रुचाइएको पाएँ ।’ लोक गीतमा नेपालीपन हुने पनि सुनिताको धारणा छ ।
सुनिता ब्यस्त गायिकाको रुपमा मानिन्छन् । देशभित्र मात्र नभएर विदेशमा हुने कार्यक्रमहरुले समेत उनलाई ब्यस्त बनाएको छ । ‘महोत्सवहरुले गर्दा निकै ब्यस्त बनाएको छ’ उनले भनिन्, ‘विदेशबाट पनि कार्यक्रमको लागि अफरहरु आइरहेको छ, त्यसैले भ्याईनभ्याई भएको छ । कार्यक्रमकै सिलसिलामा कतार, दुवई, मलेसिया, सिंगापुर, जापान, कोरिया, अमेरिका, साउदी अरब, कुवेत, भारत लगायतका दर्जन मुलुकको भ्रमण गरिसकेकी सुनिताले चाँडै युरोप टुरमा जान लागेकी बताइन् । उनले भनिन्, ‘सांगीतिक कार्यक्रम लिएर युरोप टुरमा चाँडै जाँदैछु ।’ म्युजुक खबर
