सुमन बैरागी,
काठमान्डौ पुस ६-गायक शिशिर योगी युवापुस्ताका चर्चित गायकका रुपमा देखिन्छन् । कर्णप्रिय स्वरका धनी गायक योगी समाज र देशप्रेमसँग बढी नजिक देखिन्छन् । हुन त उनी माया प्रेमका गीतमा पनि नझुमेका होइनन्, तर पनि उनलाई परिचित गराउने गीतहरु भने समाज र देशप्रेमका कथाव्यथाभित्रै झल्किएका छन् । गायनको लामो यात्रा पार गरिसकेका गायक योगी दाङबाट काठमाडौंको यात्रा गर्दा सांगीतिक छविले उनको उचाई उच्च भएको छ । जति उनी गायनमा अघि बढ्दै गएका छन् उनका सुमधुर स्वरले उति नै चर्चा पाउने गर्छ ।
सारङ्गी त रेटे पनि.... बोलको गीत समाजमा निकै चर्चा बटुल्न सफल भयो । त्यो त समाजभित्रको कथा बोलेको थियो तर तिमीले पराइ ठानेपछि... बोलको गीत मायाप्रेमको थियो । यस्ता हजारौं गीतहरु उनले गाइसकेका छन् । तर उनी अझै सन्तुष्ट भने हुन सकेका छैनन् । गीत संगीत भनेकै मेरो प्राण हो, उनी भन्दै थिए – ‘जीवनको उत्सर्ग पनि गीतसंगीतमै खोजिरहेको छु ।’ यही सांगीतिक आरोह अवरोहको अगाडि अब भने उनी ‘मोडमोडमा’ नामक सोलो गीतिसङ्ग्रह लिएर आउने भएका छन् ।
मोडमोडमा एल्बम छिट्टै रिलिजको क्रममा रहेका छन् । यस सङ्ग्रहले सबै गीतलाई प्रतिनिधित्व गर्ने गर्छ । यस गीतमा उनले वरिष्ठ तथा पुराना सर्जकहरुको सिर्जनालाई संगीतमा सजाएका छन् । मोडमोडमा गीत रत्नशमशेर थापाले लेखेका छन् भने अम्बर गुरुङको संगीत रहेको छ । त्यसैगरी सियोको टुप्पोले मुटु बिझ्यो दमाइदाइ, लहरको बोली जस्ता गीतका सर्जक महाकवि लक्ष्मीप्रसादका शब्दहरुमा शिशिर योगी आफैंले संगीत भरेका छन्भने कानुनविद् डा.भिमार्जुन आचार्यको शून्यतामा एक्लो जीवन... बोलको गीतलाई पनि उनले आफ्नो स्वर संगीत प्रदान गरेका छन् । उनको एकल स्वर रहने यस एल्बममा अर्को एक गीत पनि समावेश गरिएको छ । जुन १७ सालमा रेडियो नेपालमा सेन्सर बोर्डले रेकर्ड गर्न प्रतिबन्ध लगाएको थियो । स्वर सम्राट नारायण गोपालले संगीत गरेर रेडियो नेपालमा गीत रेडर्क गर्न खोज्दा सेन्सर बोर्डले रोकेको गीत अहिले उनले रेकर्ड गर्ने मौका पाएका छन् । एक मुठी चामल... बोको गीत रत्नशमशेर थापाले लेखेका थिए । गायक रुबी जोशीसँग त्यसको डमी रहेको फेला पारेपछि उनले त्यही डमीलाई रेकर्ड गर्न पाएकोमा निकै हर्षित भएको बताउँछन् । ‘स्व.स्वरसम्राट नारायण गोपालले आफ्नो जीवनको आरोहअवरोह सबै गीतसंगीतमै समर्पित गर्नुभयो तर यो गीत भने रेकर्ड गर्न पाउनुभएन, त्यही गीत मैले रेकर्ड गर्न पाएकोमा म अत्यन्तै खुशी भएको छु,’ उनले गर्व गर्दै भने । छिट्टै रिलिजको तयारीमा रहेको एल्बम मोडमोडमाको बजार प्रबद्र्धन भने शिशिर योगी संगीत प्रतिष्ठानले गर्ने भएको छ ।
