समुन्द्र पौडेल
तनहुँ पुस १६गते ।
सम्पतीको नाउमा रहेको एक हल गोरु मध्येको एउटा गोरु मरेपछि व्यास-५ डिहीगाउँका मनु गिरीको सहारा गुमेको छ । विद्युत कार्यालयको लापरर्वाहीले शनिवार बिहान करेण्ट लागेर उनको गोरु मरेको हो ।
गोरु चराउन लैजाने क्रममा खेतमा वेवारिसे अवस्थामा रहेको विजुली तार गोरुले छुदाँ गोरुको मृत्यु भएको हो । गोरु मरेपछि गाउँलेको खेतमा गोरु जोतेर परिवारको गुजारा चलाउँदै आएका उनको आयश्रोतसमेत खोसिएको छ । 'दिनभर काम गरेर ७ सय रुपैया आम्दानी हुन्थ्यो ।' उनले भने, 'अब कसरी हात मुख जोड्ने हो ।'
२०६३ साल भदौ २४ गते तनहुँकै रिसिङ रानीपोखरीमा आएको पहिरोबाट घर जोखिममा परेपछि गाउँबाट विस्थापित भएका उनी डिहीगाउँमा सानो जग्गामा बस्दै आएका छन् । उक्त पहिरोमा परी दुई घर परिवारका ६ जनाको मृत्यु भएको थियो ।
