रामचन्द्र अधिकारी
धनकुटा, मंसिर ५ - सान्ने ८ का ४३ वर्षीय देवेन्द्र अधिकारीले आफ्नै छोरीलाई आइतवार राति बलात्कार गरेको अभियोगमा प्रहरीले पक्राउ गरेको छ ।
बाबुबाट बलात्कृत भएपछि किशोरीले प्रहरीमा सोमवार उजुरी गरेपछि अभियुक्तलाई पक्राउ गरिएको प्रहरी निरीक्षक विनोद शर्माले जानकारी दिए । विद्यालयको गृहकार्य गरेर सुत्न लाग्दा बाबुले बलत्कार गरेको पीडितले बताइन् ।
‘भुईँतलामा होमवर्क गर्दै थिए’, उनले घटनाबारे सुनाइन्, ‘रेडियो सुनिरहेका बुवाले अकस्मात अपराध गर्नु भयो ।’ घटनाबारे आमालाई सुनाएपछि सोमवार बिहान जिल्ला प्रहरी कार्यालयमा पीडित युवतिले रुँदै गुहार मागेकी थिइन् । प्रहरीले अधिकारकर्मी, सञ्चारकर्मी, महिलावादी संघसंस्थाका प्रतिनिधि र कानुन व्यवसायी भेला गरी घटनाबारे जानकारी गराएको छ ।
सहभागी सामु पीडितले आफुलाई बचाउन बारम्बार अनुरोध गरिन् । मानसिक रुपमा समेत निकै विछिप्त बनेकी पीडितले अपराधमा सम्लग्न बाबुलाई कारवाहीको माग गरिन् । उनको उजुरीको आधारमा प्रहरीले तत्काल पक्राउ गरी हाल हिरासतमा राखेको छ ।
घटनाबारे प्रहरीले अदालतमा मुद्धा अघि सार्ने जनाएको छ । बारम्बार मादक पदार्थ खाएर पत्नि र छोराछोरीलाई शारिरीक र मानसिक यातना दिने गरेको पीडितले बताइन् ।
source:eknatipur
