काठमाडौँ, असोज ३०
मनकामना दर्शन गर्न गइरहेको एउटा पर्यटक भ्यानलाई आज बिहान नागढुङ्गानजिक ट्रकले ठक्कर दिँदा भ्यानमा सवार गुरुङ परिवारका नौ जना घाइते भएका छन्। ती मध्ये तीन जनाको अवस्था गम्भीर रहेको प्रहरीले जनाएको छ। मनकामना दर्शन गर्न गइरहेको बा१य ८३७ नं. को पर्यटक भ्यानलाई बिहान साढे ५ बजे नागढुङ्गा चोकबाट २०० मि. तल चिसापानीमा सोही रुट गइरहेको ना१ख ३३२८ नं. को ट्रकले ठक्कर दिएको थियो। ठक्करपछि पर्यटक भ्यान अगाडि रहेको ना२ख ४५८० नं. को ट्रकमा ठोक्किन गई भ्यान पूर्ण रुपमा क्षति भएको ट्राफिक प्रहरीले जनाएको छ। भ्यानमा सवार गोंगबु बस्ने ३० वर्षका ध्रुवलाल गुरुङ, ५२ वर्षकी चन्द्रकला गुरुङ र नौ वर्षका रिमेन गुरुङ गम्भीर घाइते छन्। त्यसैगरी देवी गुरुङ वर्ष-४२, चन्द्रबहादुर गुरुङ वर्ष-४०, मेचबहादुर गुरुङ वर्ष-३०, रिता गुरुङ्ग वर्ष-२५ बिष्णु गुरुङ वर्ष-२५ र शुभलाल गुरुङ वर्ष-६१ सामान्य घाइते भएका छन्।
Source:gorkhalionline
