लमजुङ, कार्तिक १०,
सधैँ टुकीको भरमा अध्याँरो काट्नु पर्ने ठाउँमा तिहारको बेलामा बिजुलीको उज्यालो पाउँदा कति खुसी आउला ? तिहारको खुसीयालीसँगै उत्तरी लमजुङको भुलभुले गाविसस्थित ताराचोक गाउँमा पहिलोपटक विजुली बलेको छ । तीन वर्ष देखि बाटोमा गाडिएका बिजुलीका पोल र तार हेरेर चित्त बुझाउन बाध्य स्थानीय वासिन्दा तिहारकै बेलामा घरघरमा बिजुली बलेपछि निकै खुसी भएका छन् ।
स्थानीय वासिन्दाको श्रमदान, विद्युत उपभोक्ता समिति, जिल्ला विकास समिति र भुलभुले गाविसको सहयोग लगायत गरि झण्डै २५ लाखको लगानीमा ताराचोकमा बिजुली बलेको हो । ताराचोक गाउँमा विजुली बलेपछि तिहारको समय स्थानीयवासिन्दाले झिलिमिलि बत्ती, रेडियो, टेलिभिजन तथा स्थानीय क्लबका लागि चाहिने विद्युतीय सामाग्रीहरु समेत खरिद गरेर गाउँ लगेका छन् ।
