महेश आचार्य
नयां दिल्ली, कार्तिक ३ - प्रधानमन्त्री बाबुराम भट्टराई चार दिने औपचारिक भ्रमणका लागि आज-बिहीबार) नयां दिल्ली आउँदैछन् । ३७ सदस्यीय टोलीको नेत्तृत्व गर्दै अपरान्ह पौने २ बजे उनी दिल्लीस्थित इन्दिरा गान्धी अन्तर्राष्टि्य विमानस्थल आइपुग्नेछन् ।
त्यहांबाट उनी चाणक्यपुरीस्थित होटल लीला प्यालेस जानेछन् । आफूले अध्ययन गरेको जवाहरलाल नेहरु विश्वविद्यालयका पुराना साथीहरु उनलाई भेट्न सोही होटलमै आउनेछन् । लगत्तै भट्टराई नागरिक समाजकोतर्फबाट साउथ एसिया फोरम फर पिपल्स् इनिसिएटिभले संवैधानिक क्लबमा आयोजना गरेको स्वागत कार्यक्रममा सहभागी हुनेछन् । राति होटल ताज प्यालेसमा नेपाल डेमोक्रेसी सोलिडारिटी कमिटीले गरेको कार्यक्रममा उनी जानेछन् । भारतीय कम्युनिष्ट पार्टीका महासचिव एबी बर्द्धनले पनि बिहीवारै उनलाई भेट्ने कार्यक्रम रहेको दिल्लीस्थित नेपाली दूतावासले जनाएको छ । भट्टराईको प्रमुख भेटवार्ता भने भोलि हुनेछ । उनले भारतीय समकक्षी मनमोहन सिंहलाई हैदरावाद हाउसमा भेट्नेछन् । त्यसपछि नेपाली र भारतीय टोलीबीच छलफल भई केही सम्झौतामा हस्ताक्षर हुनेछ । त्यसलगत्तै सिंहले भट्टराईको सम्मानमा हैदरावाद हाउसमा रात्री भोज आयोजना गर्नेछन् । सिंहसंग भेट्नुअघि दिनभर भट्टराई अन्य उच्चस्तरीय भेटघाटमा व्यस्त रहनेछन् । राष्ट्पति प्रतिभादेवी सिंह पाटिल, उपराष्ट्पति हमीद अन्सारी, सत्तारुढ युनाईटेड प्रोगेसिभ एलायन्स् युपीएकी अध्यक्ष सोनिया गान्धी, अर्थमन्त्री प्रणव मुखर्जी, विदेशमन्त्री एसएम कृष्णा र लोकसभामा विपक्षी दलकी नेत्तृ सुष्मा स्वराजले भट्टराईसंग छुट्टाछुट्टै भेटवार्ता गर्नेछन् । भारतीय जनता पार्टीका राष्टि्य अध्यक्ष नीतिन गड्करीले भने हैदरावाद हाउसको रात्री भोज सकिएपछि भट्टराईलाई उनी बसेकै होटलमा भेट्नेछन् ।त्यसअघि बिहान भट्टराई राजघाटस्थित महात्मा गान्धीको समाधिस्थल पुगी माल्यार्पण गर्ने कार्यक्रम राखिएको छ । भोलि नै उनी भारतीय व्यवसायीका संगठनहरु कन्फेडेरेशन अफ इण्डियन इन्डस्ट्री, फेडेरेशन अफ इण्डियन च्याम्बर अफ कमर्श एण्ड इन्डस्ट्री र एशोसिएटेड च्याम्बर्स अफ कमर्स एण्ड इन्ड्स्ट्रीले संयुक्त आयोजना गरेको छलफलमा सहभागी हुनेछन् । पर्सि शनिवार पनि थप भेटघाटमा भट्टराई व्यस्त हुनेछन् । गृहमन्त्री पी चिदम्बरम, रक्षामन्त्री एके एन्टोनी तथा भारतीय कम्युनिष्ट पार्टीका वरिष्ठ नेताहरुसंग उनको भेट हुनेछ । आफूले विद्यावारिधि उपाधि लिएको जवाहरलाल नेहरु विश्वविद्यालयले आयोजना गरेको कार्यक्रममा भट्टराई सरिक हुनेछन् । जनता दल युनाईटेडका अध्यक्ष शरद यादवले आफ्नो निवासमा भट्टराईको सम्मानमा आयोजना गरेको कार्यक्रममा उनी सहभागी हुनेछन् । उक्त कार्यक्रममा भारतका विभिन्न दलका नेताहरु सहभागी हुने यादवका सहयोगीहरुले बताएका छन् । नेपाली दूतावासले सोही दिन प्रधानमन्त्रीको सम्मानमा रिसेप्सनको आयोजना गरेको छ । शनिवार बिहान पनि भारतीय व्यवसायीका संगठनहरु कन्फेडेरेशन अफ इण्डियन इन्डस्ट्री र फेडेरेशन अफ इण्डियन च्याम्बर अफ कमर्श एण्ड इन्डस्ट्रीका प्रतिनिधिहरुले प्रधानमन्त्रीसंग भेट गर्नेछन् । भ्रमणको अन्तिम दिन आइतवार प्रधानमन्त्री बिहानै दिल्लीको पालमस्थित एयर फोर्स स्टेशन अवलोकनका लागि पुग्नेछन् । त्यसपछि विशेष विमानमार्फत उत्तराखण्ड राज्यको राजधानी देहरादून पुग्नेछन् । देहरादूनबाट हरिद्धार पुगी उनले त्यहांस्थित स्टेट इन्ड्स्ट्रीयल डिभलोप्मेन्ट कर्पारेशन सिडकुल अन्तर्गतको विशेष आर्थिक क्षेत्रको अवलोकन गर्नेछन् । देहारदूनमा उत्तराखण्डकी गभर्नर मार्गरेट आल्भासंग भेटेपछि भट्टराई नयां दिल्ली हुंदै स्वदेश र्फकनेछन् ।
