गोरखा कार्तिक २-
नेपाली काँग्रेसका उपसभापति एवं काँगेस संसदीय दलका नेता रामचन्द्र पौडेलले क्यान्टोन्मेन्टमा रहको माओवादी लडाकुहरुको सम्मान जनक नभै समानताजनक समायोजन हुने बताउनुभएको छ । प्रेस युनियन गोरखाद्वारा आज गोरखाको गोरखाकाली मन्दिरमा आयोजित पत्रकार सम्मेलनमा पत्रकारहरुले सोधेको प्रश्नको जवाफ दिँदै उहाँले माओवादी शान्ति प्रक्रियाका लागि लचक भएको तर व्यवहारमा कार्यान्वयन भने नगरेको बताउनुभयो । सेना समायोजनको लागि पहिले तह निर्धारण गर्नुपर्ने र संख्या तोक्नुपर्ने उहाँले बताउनुभयो । क्यान्टोन्मेन्टमा कष्टकर जीवन विताईरहेका १९ हजार सेनालाई नै समायोजन गर्दा नेपाली काँग्रेसलाई के आपत्ती हुन्छ भन्ने पत्रकारको प्रश्नमा उहाँले आक्रोशित हुँदै क्यान्टोनमेन्टमा १९ हजार नभएको कोही अन्धा अपाङ्ग, केटाकेटी रहेको भन्दै उनीहरु सबैको सेनामा समायोजन हुन नसक्ने बताउनुभयो । पत्रकारको उक्त प्रश्न प्रति अर्का नेता मनमोहन भट्टराईले राज्यको ढुकुटीबाट माओवादीका लडाकाहरुलाई राहत दिन नसकिने बताउनुभयो । ४५ दिनमा सरकारले शान्ति प्रक्रिया निष्कर्षमा पुर्याउने भनेको थियो त्यसो नभए राजीनामा दिने कुरा पनि थियो किन कार्यान्वयन नभएको त भन्ने प्रश्नको उत्तरमा पौडेलले सत्तामा पुगेपछि सबैको बोलि फेरिएको बताउनुभयो ।
तपाईंको पाटी भित्रको झगडा कहिले मिल्छ भन्ने प्रश्नमा उहाँले सबै कुरा मिलिसकेको जानकारी दिनुभयो । नेता पौडेल नेपाली काँग्रेस गोरखाको क्षेत्रीय सम्मेलनको कार्यक्रममा कार्यकर्तालाई प्रशिक्षण दिन हिजो गोरखा आउनुभएको हो । पौडेल आजै काठमाण्डौ फर्कने नेपाली काँग्रेस जिल्ला सभापति हरी बहादुर घलेले बताउनुभयो ।
