काठमाडौँ २५ असोज, पार्टीमा जारी विवाद समाधानको प्रयासमा एकीकृत नेकपा माओवादी पदाधिकारी बैठक अहिले जारी छ । अध्यक्ष प्रचण्डको निवास नयाँ बजारमा जारी बैठकमा आगामी २९ असोजमा राजधानीमा डाकिएको अगुवा कार्यकर्ता राष्ट्रिय प्रशिक्षण, साँचो हस्तान्तरण विवाद, चारबँुदे सहमति लगायतका विषयमा छलफल भइरहेको बताइएको छ । संस्थापन पक्षले राष्ट्रिय कार्यकर्ता भेला बोलाएपछि उपाध्यक्ष मोहन बैद्यले त्यसप्रति आपत्ति जनाउँदै रोक्न दबाब दिइरहेको छ ।
बैद्यले मंगलबार प्रचण्डलाई भेटेर भेला रोकी केन्द्रीय समिति बैठक डाक्न आग्रह गरेका थिए । बैद्य पक्षलेसंस्थापन पक्षले संस्थापनले डाकेको भेलालाई गुटगत भेलाको संज्ञा दिँदै २८ गते समानान्तर भेला बोलाउने तयारी गरिरहेको छ । पदाधिकारी बैठकअघि अध्यक्ष प्रचण्ड र उपाध्यक्ष बैद्यले आफू पक्षधर नेताहरुसँग बेग्लाबेग्लै परामर्श गरेका थिए । संस्थापन पक्षले गतसाउनमा सम्पन्न केन्द्रीय समितिको निर्णयअनुसार राष्ट्रिय भेला प्रशिक्षण आयोजना गरिएको बताएको छ भने बैद्य पक्षले आफूहरुसँग सल्लाह नै नगरी आयोजना गरिएको भेला बहिस्कार गर्ने चेतावनी दिँदै आएको छ । स्रोतका अनुसार बैद्य पक्षले २९ असोजमा केन्द्रीय समितिको बैठक डाकेर भेला एकदिन पछि सारिए आफूहरु पनि सहभागी हुने बताएको छ ।
साभारः अनलाइन खबर डटकम
