केपी ढुंगाना, काठमाडौं, साउन २६- डेटिङको बहानामा जंगल लगेर सहयोगीमार्फत हत्या गरेको अभियोगमा २१ वर्षे सुभाष उप्रेती पक्राउ परेका छन्। उनले गत शुक्रबार दिउँसो १२ बजे रोजी महर्जनलाई ललितपुरको सिमपानी भञ्ज्याङ जंगल लगेर आपराधिक समूहको सहयोगमा हत्या गराएको प्रहरीले जनाएको छ। घटनामा संचित खड्का, कुमार तामाङ, राजु लोहार, हुसेन राई र कुमार तामाङ संलग्न रहेको प्रहरीको प्रारम्भिक अनुसन्धानबाट खुलेको छ। यसमध्ये संचित र हुसेन समातिएका छन्। दुवै सुभाषका साथी हुन्। यिनले हत्याको योजना थाहा पाएर पनि लुकाएको प्रहरीको आरोप छ। महानगरीय प्रहरी अपराध महाशाखा प्रमुख हेमन्त मल्लका अनुसार मुख्य योजनाकार सुभाषले राजु र कुमारलाई पैसा दिएर रोजीको हत्या गराएका हुन्। घटनामा प्रयोग भएको हतियार कुमारले ल्याएका थिए। गोली भने राजुले चलाएको प्रहरीको दाबी छ। दुवै फरार छन्। सुभाषले रोजीको हत्या गराउन १ लाख ७५ हजार रुपैयाँ 'सुपारी' दिएको बुधबार सार्वजनिक प्रारम्भिक अनुसन्धान विवरणमा छ। उनले असोज १८ गते २५ हजार पेस्की र हत्यालगत्तै १ लाख ५० हजार रुपैयाँ दिएको बयानमा भनेका छन्। दुई वर्षदेखि सम्बन्ध रहेको रोजीसँग खटपट भएपछि सुभाषले हत्या योजना बनाएका हुन्। उनले रोजीको परिवारसँग एक करोड असुल्ने र हत्या गर्ने योजना गर्दै डेटिङको बहानामा ललितपुर नल्लु गाविसमा पर्ने सिमपानी भञ्ज्याङको जगंल लगेका थिए। अघिल्लो दिनै राजु र सुभाषले हत्या गर्ने ठाउँ हेरेर आएको प्रहरी अनुसन्धानबाट खुलेको छ।
सुभाषले 'लेले घुम्न जाउँ' भन्दै फकाएर रोजीलाई मोटरसाइकलमा जंगल पुर्याएका थिए। योजनाअनुसार राजु र कुमार दुवैलाई पछ्याउँदै त्यहीँ पुगे। राजुले मोटरसाइकलबाट ओर्लनुअघि नै रोजीलाई गोली हाने। हत्यापछि दुवैले शव जंगलभित्र फ्याँकेका थिए। रोजीको मोबाइलबाट उनको दाजुलाई ३० लाख रुपैयाँ माग गर्दै एसएमएस आएपछि परिवारले प्रहरीलाई खबर गरेको थियो। एसएमएसमा 'रकम नपाए तेरो छोरीको भिडियो बनाएर गोली हान्ने' धम्की दिइएको थियो। रोजीका साथीले दिएको सूचनाका आधारमा प्रहरीले शुक्रबारै सुभाषलाई पक्राउ गर्यो। तर, हत्या भइसकेको तथ्य मंगलबार बेलुकीमात्र खुलेको महाशाखाका डिएसपी हृदय थापाले बताए। 'सुभाषले सुरुमा त केही थाहा छैन भन्दै झुक्याइरह्यो,' उनले भने, 'केरकार गरेपछि मंगलबार बेलुका रोजी ज्युँदो छैन भनेर बयान दियो।' त्यसपछि सुभाष आफैंले प्रहरीलाई घटनास्थल पुर्याए, जहाँ सडेको अवस्थामा शव फेला परेको प्रहरीले जनायो। सुभाषले बयानका क्रममा आफ्ना सहयोगीहरूको पनि नाम पोले। त्यही आधारमा संचित र हुसेन पक्राउ परे। अर्का सहयोगी कुमारको कोठा छापा मार्दा ७ दशमलव ६२ एमएमको दुईवटा गोली फेला परेको प्रहरीले जनाएको छ। रोजीको हत्यामा यस्तै हतियार प्रयोग गरिएको भनिए पनि हतियार फेला परेको छैन। सुभाषले भनेअनुसार कुमारले केही समयअघि तराईबाट तीनवटा पेस्तोल ल्याएर बेचेका थिए। राजुले यसअघि तीनजनाको हत्या गरिसकेको बयानमा छ। कुपन्डोलमा परिवारसँगै बस्दै आएकी रोजी कान्छी छोरी हुन्। उनका बाबु क्याटरिङ व्यवसायमा संलग्न छन्। नयाँ बानेश्वर बस्ने सुभाषका बाबु सरकारी सेवामा छन्। नेपाल कलेज अफ म्यानेजमेन्टमा दुवैको भेट भएको थियो। कलेजमा उनीहरूबीच गाढा मित्रता भएको थियो। रोजी त्यहीँ बिबिए पढ्थिन्। सुभाष भने केही समयपछि बेलायत पढ्न गए। तर, लामो समय बस्न सकेनन्। अध्ययन नसकी एक वर्षमै फर्किए। उनले 'रोजीसँगको विछोड सहन नसकेर फर्किएको' बयान दिएका छन्। 'रोजीले नेपाल फर्क भनेर कर गरेपछि फर्किएँ,' उनको बयानमा छ, 'फर्कंदा उनी बदलिइसकेकी रहिछन्।'बेलायतबाट फर्किएपछि सुभाषलाई उनका साथीहरूले रोजीको अर्कै 'ब्वाइफ्रेन्ड' भएको सुनाए। 'मैले यसबारे कुराकानी गर्न चोभार बोलाएँ। तिम्रो अर्को केटासँग सम्बन्ध छ भनेर सोध्दा उनले छैन भनिन्,' सुभाषले बयानमा भनेका छन्, 'चोभार मन्दिरमा लगेर कसम खुवाउँदै सिउँदोमा सिन्दुर हालिदिएँ।'
त्यसको केही दिनमा रोजीको मोबाइल हेर्दा अर्कै केटासँग बसेको तस्बिर फेला परेपछि उनीहरूपछि खटपट चुलिएको र यो घटना भएको प्रहरीको भनाइ छ। साभारः नागरिक
