११ साउन: सडकमा सवारी बिग्रिएका कारण नारायणगढ-मुग्लिन सडकखण्डमा बिहान ५ बजेदेखि सवारी आवागमन ठप्प भएको छ। ट्रक बिग्रिएर बाटो अवरुद्ध भएका कारण सडकखण्ड अवरुद्ध बनेको हो। सो सडकखण्डअन्तर्गत कविलाश गाविसको १४ किलोमा नारायणगढबाट काठमाडौंतर्फ जाँदै गरेको ना३ख ९७७४ नम्बरको मालबाहक ट्रक बिग्रिएकाले सवारी आवागमन ठप्प भएको जिल्ला प्रहरी कार्यालय चितवनले जनाएको छ।सोही स्थानमा काठमाडौंतर्फ जाँदै गरेको ना४ख २२३४ नम्बरको ट्रक कटाउने प्रयास गरिँदा सोही स्थानमै ट्रक नालीमा खसेकाले दुईतर्फी सवारी ठप्प भएको प्रहरीले जनाएको छ। सवारी आवागमन अवरुद्ध हुँदा नारायणगढबाट मुग्लिनतर्फ हिँडेका र मुग्लिनबाट नारायणगढतर्फ आउँदै गरेका सयौँ सवारीसाधन बीच बाटोमै अलपत्रमा परेका छन्। चितवनमा अत्यधिक वर्षा भएकाले सडक खुलाउन समस्या परे पनि प्रयास भने भइरहेको चितवन प्रहरीले जनाएको छ।
