२९ असार, काठमाडौँ । आदिकवी भानुभक्त आचार्यको १ सय ९८ औं जन्मजयन्ती आज राजधानी लगायत मुलुकका विभिन्न स्थानमा विविध कार्यक्रम गरी मनाइंदै छ । भानु जयन्तिका अवसरमा भानु साहित्यिक प्रतिष्ठानको आयोजनामा राजधानीमा आज बिहानै एक प्रभातफेरि निकालिएको छ । प्रधानमन्त्री झलनाथ खनाल र साहित्यकार, तथा साहित्य अनुरागीहरुको सहभागितामा भानुभक्तको शालिक भएको स्थान रानीपोखरीबाट सुरु भएको प्रभातफेरि कमलादीस्थित प्रज्ञा भवनमा पुगेर सकिएको थियो ।प्रज्ञा भवनमा रहेको आदिकवीको शालिकमा प्रधानमन्त्री खनालले उहाँप्रति माल्यार्पण गरी श्रद्धाञ्जली व्यक्त गर्नुभएको थियो । सो अवसरमा प्रम खनालले भानुभक्तले नेपाली साहित्यको उत्थानमा पुर्याउनुभएको योगदानको चर्चा गुर्नभयो । उहाँले सरकारले भानुभक्त प्रतिष्ठानलाई दिादै आएको सहयोग रकम केही वर्षयता रोकिएकामा आफूले पूनः सूचारु गर्ने विषयमा आवस्यक ध्यान पुर्याउने बचन दिनुभयो ।कार्यक्रममा प्रधानमन्त्रीले नेपाली साहित्यको विकासमा योगदान पुर्याए बापत साहित्यकार डा. आनन्ददेव भट्ट र कथाकार तोया गुरुङलाई सम्मान गर्नुभयो । प्रभातफेरिपछि प्रज्ञा भवनमा आयोजित एक कार्यक्रममा स्रष्टाहरुले भानुभक्तको सम्झनामा उहाँका कृतिहरुको वाचन गरेका थिए । भानु जयन्तीका अवसरमा आजै भानुभक्तको जन्म भएको तनहुाको चुँदीरम्घामा पनि एक विशेष कार्यक्रम आयोजना गरिएको छ ।जटिल संस्कृत भाषामा लेखिएको रामायणलाई सरल नेपाली भाषामा अनुवाद गरेर नेपाली साहित्यमा अतुलनीय योगदान दिएका आचार्यले रामायण बाहेक प्रश्नोत्तरी, भक्तमाला, वधुशिक्षा, रामगिता जस्ता उत्कृष्ट कृति र फुटकर कविताहरु पनि लेख्नु भएको छ । विसं. १८७१ असार २९ गते आजैका दिन जन्मनु भएका आचार्यको ५५ वर्षको उमेरमा विसं.१९२६ सालमा निधन भएको थियो । साभार अनलाइन खबर
