म्युजिक अफ हार्मोनी पुर्ण तयारीमा / यहि १६ र १७ जुन (विहिवार र शुक्रवार) देशी तथा विदेशी कलाकारहरुको साथ दोहा जु को ड्रिम पार्कको एउटै मञ्चमा

रवि राेषि दोहा म्युजिक अफ हार्मोनी– रक्स कतार’ले यहि १६ र १७ जुन (विहिवार र शुक्रवार) देशी तथा विदेशी कलाकारहरुको साथ एउटै मञ्चमा आयोजना गर्ने मनोरञ्जनात्मक सांस्कृतिक कार्यक्रमको तयारी पुर्णरुपले सम्पन्न भइसकेको इभेन्ट म्यानेजर डेविड क्षेत्रीले बताएका छन् । नमस्ते नेपाल प्रालीसंगको सहकार्यमा प्रोग्रेसिभ सोलुसन्स, निम्बस ट्रेडिङ र ड्रिम पार्क दोहा जुले आयोजना गर्न लागेको सो इभेन्ट यस बर्षको क्यालेन्डरकै उत्कृष्ट आयोजना हुने क्षेत्रीको विश्वास छ ।

चिडियाखानाभित्रको ‘ड्रिम पार्क’मा दुई दिन आयोजना हुने सो कार्यक्रमका लागि नेपालबाट इन्डियन आइडल प्रशान्त तामाङ, १९७४ एडी का एड्रिन प्रधान, सन्जय श्रेष्ठ, मनोज केसी, निराकर याक्थुङ्ग कतार आउँदैछन् । कतारवासीको मनोरञ्जनका लागि चर्चित हास्य कलाकार जितु नेपाल (मुन्दे्र) र नेपाली चलचित्रकी नायिका तथा कुशल नृत्यांगना दिया मास्के पनि दोहा आउँदैछन् । उनीहरू बुधवार साँझ दोहा आइपुग्ने क्षेत्रीले बताए । विदेशी कलाकारहरुमा फिलिपिन्सको चर्चित रिभिजस व्याण्डका एकोन, बिनो, मार्क, जोन, इटेनले अंग्रेजी तथा फिलिपिनो रक प्रस्तुत गर्नका लागि तम्तयार अवस्थामा रहेको क्षेत्रीले बताए ।

यसअघि पनि निकै लोकप्रियता पाइसकेको बिट्स एण्ड बाईट्सका चर्चित नृत्यकार तथा नृत्यांगनाहरुले फ्रि स्टाइल डान्स तथा वेली नृत्य प्रस्तुतिले निरन्तरता पाउनेछ भने कतारमा स्थापित अर्का स्थानीय ‘प्रोजेक्ट टु हन्ड्रेड सिक्स’ र ‘एरियाकोड नाइन सेभेन फो’ नामक फिलिपिनो व्याण्डहरूले पनि आफ्नो प्रस्तुतीबाट नेपालीजनको मन जित्ने प्रयास गर्दैछन् । कार्यक्रमको डुंगा जितु नेपाल मुन्द्रेले खियाउने छन् भने म्युजिक अफ हार्मोनी समूहले पनि आफ्नो रक प्रस्तुत गर्ने तयारीमा जुटेको छ ।

म्युजिक अफ हार्मोनी टिम उदय राई, निर्मल सुन्दास, नरेश रायमाझी, पप्पु केसी, गंगा श्रेष्ठ र डेविड क्षेत्री लगायतको समुह हो । डेविड क्षेत्री सो समुहका गायक हुन् । भर्सेटाइल गायक क्षेत्रीले उनले विगतमा पनि केहि एलबमहरू श्रोतामाझ ल्याइसकेका छन्. । उनले कार्यक्रममा ‘ओल्डी÷गोल्डी’ नेपाली तथा १९७०÷८० तिरका कर्णप्रिय अंगे्रजी रकहरु प्रस्तुत गर्ने बताएका छन् । विभिन्न देशका कलाकारहरूलाई एउटै मञ्चमा उतारेर विश्वबन्धुत्वको भावना अघि सार्नुका साथै सांस्कृतिक पहिचान विनिमय गर्नु सो आयोजनाको लक्ष्य रहेको उनले बताएका छन् ।

शुक्रवारको शोका लागि विभिन्नदरका टिकटहरू बजारमा उपलब्ध रहेको जनाउँदै म्यानेजर क्षेत्रीले विहिवार साँझको कार्यक्रमका लागि भने कार्यक्रमस्थलमा मात्रै टिकट दिन सकिने बताए । सो कार्यक्रममा फिलिपिनो दर्शकहरुको पनि भारी उपस्थिती रहने उनले बताएका छन् । टिकट बिक्रीबाट प्राप्त आम्दानी नेपालका अनाथ तथा विकलांग बालबालिकाको सहयोगार्थ प्रदान गरिने जनाउँदै उनले सहभागिताका लागि अपिल गरेका छन् ।