कान्तिपुर संवाददाता ०
लस एन्जल्स (एजेन्सी), अषाढ १ - हलिउडमा रोमान्सको हल्ला चल्नु सामान्य हो । तर, भेट्दै नभेटेको नायक ब्राड पिटसँग नाम जोडिएपछि अस्ट्रेलियन नायिका बेला हिथकोट अचम्भित भएकी छन् ।
ट्याबलोइडका अनुसार २३ वर्षीया बेलाले ब्राडलाई युवा अवस्थाकी पार्टनर एन्जेलिना जोलीको याद दिलाएकी थिइन् । 'कोगन्स ट्रेड' फिल्मको छायांकनका बेला नायिकालाई भेटेपछि 'मिस्टर एन्ड मिसेज स्मिथ' स्टारले 'युवा अवस्थाकी एन्जेलिना जस्ती' भनेर प्रशंसा गरेका थिए । त्यसका साथै केही ट्याबलोइडले यी दुईलाई 'नग्न विवाद' मा समेत समातिएको दाबी गरे ।यस्ता मनगढन्ते कुराहरू सुनेर अचम्भितका साथै रुष्ट भएकी नायिका बेलाले 'इनस्टाइल' म्यागजिनसँग भनिन्, 'मैले ब्राडलाई भेटेकै छैन । फिल्ममा रे लिवट्टासँग मात्र केही दृश्य छन् । फिल्मसँग मेरो त्यति मात्र सम्बन्ध हो ।' भेट्दै नभेटेको व्यक्तिसँग रोमान्सको हल्ला चलेपछि उनले त्यसलाई हाँसोमा उडाउने ठानेकी छन् ।'योभन्दा हाँसोउठ्दो कुरा के हुन सक्छ,' उनले भनिन्, 'सुरुमा सुन्दा पेट मिचिमिची हाँसें ।'गत वर्षको हिथ लेजर छात्रवृत्ति पाएकी बेलाले उक्त अन्तर्वार्तामा चर्चित नायिका बन्न आफूले कहिल्यै हतार नगरेको खुलाइन् । 'नाओमी वाट्सलाई हलिउडमा सफल हुन सात वर्ष लागेको थियो । मलाई पनि केही वर्ष त अवश्य लाग्नेछ भन्नेमा म सचेत छु,' उनले भनिन्, 'एक वर्षमै कलाकार भएर जीविकोपार्जन गर्न सक्छु भन्ने लागेको थिएन । तर, अहिले सकिरहेकी छु । यो मेरा लागि ठूलो उपलब्धि हो ।' अस्ट्रेलियन टेलिसिरियल 'नेबर्स' बाट विश्वभर नाम कमाएकी बेला केही समयपछि 'पाइरेट्स अफ क्यारिबियन' स्टार जोनी डेपसँग 'डार्क स्याडोज' को छायांकनमा लाग्दै छिन् ।
नायक ब्राडले केही समयअघि नायिका एन्जेलिनासँग विवाह गर्नेबारे सोचिरहेको खुलाएका थिए । 'छोराछोरीले हाम्रो विवाहका बारेमा सोध्छन्,' उनले भने, 'उनीहरूका लागि यो महत्त्वपूर्ण हँुदै गएको छ । त्यसैले, हामी यसबारे सोचिरहेका छौं ।' ६ वर्षदेखि एन्जेलिनासँग सम्बन्धमा रहेका उनले आफ्ना ६ जना सन्तानलाई हुर्काउँदा गल्तीहरू गर्ने बताए । तर, एन्जेलिनाले उनलाई 'उत्कृष्ट पुरुष र पिता' बताएकी थिइन् ।
