विबेक खनाल
तनहुँ, वैशाख । तनहुँमा रहेका दुई हजारभन्दा बढी तामाङले गुरुङ थर लेखिसकेका छन् । नेपाल तामाङ घेदुङ जिल्ला कार्य समिति तनहुँद्वारा तनहुँको पुर्कोटमा आयोजित प्रशिक्षण कार्यक्रममा जानकारी गराइएको हो । नेपाल तामाङ घेदुङ पुर्कोट एकाइ अध्यक्ष कलबहादुर तामाङको अध्यक्षतामा सम्पन्न कार्यक्रमको प्रमुख अतिथि नेपाल तामाङ घेदुङ जिल्ला कार्य समिति तनहुँका अध्यक्ष धन सुब्बा तामाङले गर्नुभएको थियो । कार्यक्रमका सहभागीलाई प्रशिक्षण दिँदै प्रमुख अतिथि तामाङले आगामी राष्ट्रिय जनगणनामा तामाङ जातिले आफ्नो जाति नै लेख्नुपर्नेमा जोड दिनुभयो । विगतमा तामाङ जातिलाई सरकारी र भारतीय सेनामा जागिर खान नदिएकाले बाध्यताबस गुरुङ लेख्नुपरेको भए पनि आगामी जनगणनामा सबैलाई तामाङ थर नै लेख्न अनुरोधसमेत गर्नुभयो । घेदुङका जिल्ला कोषाध्यक्ष जीतबहादुर तामाङले २८४८ औँ सोनाम ल्होसारको उपलक्ष्यमा जिल्ला घेदुङले गरेको गतिविधिका बारेमा प्रकाश पार्नुभएको थियो । उक्त तालिममा १०० जना तामाङ समुदायको सहभागिता रहेको थियो ।
